Fjala e ministres Kodheli në Kuvend mbi projektligjin për sigurimin shoqëror suplementar të ushtarakëve të FA...

e enjte, 13 tetor 2016 17:28

Projektligji: “Për disa shtesa dhe ndryshime në ligjin nr. 10.142, datë 15.5.2009 “Për sigurimin shoqëror suplementar të ushtarakëve të Forcave të Armatosura, të punonjësve të Policisë së Shtetit, të Gardës së Republikës, të Shërbimit Informativ të Shtetit, të Policisë së Burgjeve, të Policisë së Mbrojtjes nga Zjarri dhe të Shpëtimit e të punonjësve të Shërbimit të Kontrollit të Brendshëm në Republikën e Shqipërisë” të ndryshuar”.

Shumë shkurt dy fjalë lidhur me projektvendimin që po diskutojmë. Me këtë ndryshim, amendim, të njërit prej neneve të ligjit egzistues për sigurimet shoqërore, ne thjesht vetëm vëmë në vend një të drejtë e cila, duhet të ishte vënë në vend kohë më përpara, që me ligjin 117 të vitit 2012, të miratuar asokohe nga qeveria e mëparshme.

Ligji, i cili me thënë të drejtën në nenin 52 të tij nuk u zbatua kurrë për shkak të së gjithë mungesës së akteve nënligjore të mbetura pezull dhe të bëra kështu në këtë mënyrë të pazbatueshme për sigurimet shoqërore. Unë do kisha dashur shumë që realisht të fokusoheshim tek rritja e sigurimeve shoqërore të këtyre njerëzve që shërbejnë dhe punojnë në këtë agjenci. Por, do ta nis këtë diskutim që ka të bëjë me, kush ka bërë çfarë dhe, kush ka përdorur kë në vitet që ka qenë më parë në qeverisje Partia Demokratike dhe, çfarë bëhet sot?

Unë ju siguroj dhe i garantoj qytetarët shqiptarë që ka një diferencë shumë të madhe dhe padyshim që mund të jem këtu për t’ju përgjigjur kujtdo prej jush, i cili  ka dëshirë ta bëjë këtë krahasim. Ajo çka dua të them sot është që, në tre vite e pak të qeverisjes sonë, numri i punonjësve të shërbimit është ulur, sepse në gjykimin tonë numri ka qenë i egzagjeruar për arsye të emërimeve nepotike që kanë qenë atje, apo të vendeve të punës të pamerituara që shumë njerëz jashtë profesionit kanë marrë.

Dua thjesht t’ju jap një shembull në periudhën e mëparshme: në një strukturë, e cila është strukturë që konsiderohet si Drejtori e Radiozbulimit, punonin 162 punonjës, prej të cilëve 35 ishin civilë. Sot kjo strukturë është reduktuar në 45 punonjës, prej të cilëve vetëm 10 janë civilë. Kjo thjesht dhe vetëm për faktin se, racionaliteti dhe eficenca me të cilën ne shpenzojmë paratë e taksapaguesve shqiptarë, duke marrë të njëjtin produkt, mbase dhe një produkt më të mirë është në qendër të vëmendjes tonë. Sot që flasim, nga tetori i vitit 2013, deri më tani, tek agjencia janë emëruar vetëm 18 veta civilë dhe të tjerët janë ushtarakë dhe ish-ushtarakë që kanë  pasur lidhje me këtë shërbim. Mosha mesatare e këtyre 18 vetave është 33,5 vjeç dhe kjo tregon se nuk kanë të bëjnë me veprimtari të tjera të mëparshme, sepse nuk e kanë pasur dot këtë mundësi.

Gjithsesi, gojarisht mund të ndaj me ju fakte  shumë domethënëse: nëqoftëse deri dje, ushtarakët apo civilët e rënë në detyrë të FA apo Ministrisë së Mbrojtjes kanë qenë të pasiguruar, sot, ata janë të siguruar kudo që ata janë në misione.

Ju kujtoj vetëm një detaj të thjeshtë që jua rikthej në vëmendje të gjithë qytetarëve (se ndofta kjo gjë ju ka shpëtuar dhe nuk ka qenë asnjëherë prezent), se me rënien në detyrë të kapiten Voglit në Afganistan (Dëshmor i Atdheut) është marrë një vendim i Këshillit të Ministrave i cili i ka akorduar familjes, një shumë prej 5 milionë lekësh. Sot, nuk ka nevojë që kjo gjë të bëhet, se, me një vendim të Këshillit të Ministrave të disa kohëve të mëparshme, ushtarët tanë që janë në mision, janë të siguruar në raste dëmtimesh, plagosjesh, apo humbje jete, ata përfitojnë 10 milionë lekë të reja.

Për të mos thënë për detyra akoma më të vështira, siç është detyra e pilotëve, sigurimi i të cilëve, pas humbjes së jetës së tyre, familjet kanë përfituar 18 milionë lekë të reja për çdo familje. Kjo vetëm për të treguar rritjen e vëmendjes, të përkujdesjes ndaj  këtyre njerëzve që ushtrojnë  detyrë të vështirë.

Është thjesht dhe vetëm ky amendim i ligjit, që barazon sigurimet shoqërore, që  paguhen për të gjithë punonjësit e tjerë në strukturat e tjera të Sigurisë apo të Inteligjencës, që bëjnë të njëjtën punë me atë të Agjencisë së Shërbimit Informativ Ushtarak. Ndaj do ftoja miqësisht të gjithë kolegëve që ta miratojmë këtë ndryshim.  

Ju faleminderit!