Fjala e ministres Kodheli në 18 - vjetorin e Forcave Speciale

Fjala e plotë e ministres së Mbrojtjes znj. Mimi Kodheli mbajtur me rastin e 18 - vjetorit të krijimit të Batalionit të Forcave Speciale

Gjeneral Bazo,
gjeneral Cahani,
komandant Dauti,
ushtarakë të pranishëm,

sot është një moment i rëndësishëm për Forcën Tokësore e në mënyrë të veçantë për Batalionin e Forcave Speciale. Tetëmbëdhjetë vjet më parë, u firmos vendimi për krijimin e këtij batalioni, që me shpejtësi u shndërrua në një nga njësitë më elitare e më të përfaqësuara të Forcave tona të Armatosura.

Keni qenë të pranishëm në operacione të përbashkëta me aleatët tanë strategjikë që në javët e para të krijimit. Për gjashtë muaj, ju patrulluat kufirin verilindor shqiptar dhe vutë jetën tuaj në rrezik për shqiptarët që jetonin në të dyja anët e kufirit. Dhe ai pagëzim në zjarr gjatë Luftës së Kosovës, ju ngriti lart si moralisht ashtu dhe profesionalisht.

Ushtarakë të këtij batalioni, iu bashkuan koalicionit të drejtuar nga Shtetet e Bashkuara të Amerikës kundër regjimit terrorist taleban në Afganistan, që në vitin 2002. Në Kabulin e largët, specialsat treguan se Shqipëria ishte në gjendje të eksportonte siguri edhe larg kufijve të saj.

Batalioni i Forcave Speciale ka njohur të gjitha misionet ndërkombëtare në të cilat janë angazhuar Forcat tona të Armatosura. Së bashku me vëllezërit tuaj binjakë Komando, keni stabilizuar dhe kthyer në normalitet qytetin iraken të Mosulit, duke marrë falenderime e përgëzime nga aleatët tanë amerikanë. Keni ngritur flamurin shqiptar në misionin e Bashkimit Evropian në Çad.

Natyrisht që puna dhe përpjekjet tuaja nuk janë fokusuar vetëm në misionet ushtarake jashtë vendit. Keni treguar ndër vite se jeni ruajtës të rendit kushtetues, që nga krijimi juaj e në vitet e vështira në vijim. Keni mbështetur strukturat e Policisë së Shtetit për vendosjen e rendit kushtetues në shumë zona e ngjarje të turbullta të fillim viteve 2000. Por, keni vepruar me vendosmëri edhe në kuadër të emergjencave civile. Të shumta janë familjet e Ultësirës Perëndimore që janë ndihmuar me vetëmohim nga ushtarakët e këtij batalioni në të gjitha përmbytjet e 15 viteve të fundit.

Ushtarakë të Batalionit të Forcave Speciale,

e gjithë kjo përpjekje 18 vjeçare ka dhe heronjtë e vet. Kapiten Feti Vogli, dëshmori i atdheut, dha jetën për një botë më të sigurt e për një të ardhme më të mirë për të gjithë.

Të nderuar të pranishëm,

problematikat e sigurisë vazhdojnë të na sfidojnë në punën tonë të përditshme. Rreziqet ndaj sigurisë euro-atlantike tashmë janë në kufinjtë e hapësirës sonë të përbashkët. Në kuadër të Aleancës më të madhe ushtarake në botë, po përgatitemi çdo ditë për të ruajtur vlerat më të mira të njerëzimit: lirinë, demokracinë dhe të drejtat e njeriut. Edhe ju, ushtarakë të Batalionit të Forcave Speciale, shumë shpejt do të përfaqësoni me dinjitet Shqipërinë në një prej misioneve NATO.

Respekt dhe konsideratë për punën e çdo ushtaraku në shërbim të Republikës së Shqipërisë. Suksese në angazhimet tuaja të mëtejshme.

Ju faleminderit!