Fjala e ministrit të Mbrojtjes Olta Xhaçka në seancën plenare mbi projektligjin për SEEBRIG

e hënë, 03 shkurt 2020 17:38

Fjala e ministrit të Mbrojtjes Olta Xhaçka në seancën plenare mbi projektligjin për Forcën Paqeruajtëse Shumëkombëshe të Europës Juglindore - SEEBRIG - South - Estern Europe Brigade.

Të nderuar kolegë,

një përshkrim të shkurtër për projektligjin që ka përgatitur dikasteri që drejtoj.

Siç e tha edhe parafolësja, Forca Paqeruajtëse Shumëkombëshe e Europës Juglindore është një nga nismat e para dhe të rëndësishme, që janë ndërmarrë në rajonin tonë me synim promovimin e sigurisë e stabilitetit, por edhe kultivimin e marrëdhënieve të fqinjësisë së mirë mes vendeve tona.

Është një iniciativë të cilës Shqipëria i është bashkuar që në vitin 1999 nën drejtimin e të ndjerit ish-ministrit Hajdaraga. Dhe është një marrëveshje që padyshim ka luajtur në rol të rëndësishëm në përgatitjen dhe rritjen e kapaciteteve profesionale të Forcave të Armatosura, sepse krijimi i kësaj force si një brigadë shumëkombëshe, me forca nga të 7 vendet anëtare, nga Shqipëria, Italia, Turqia, Greqia, Rumania, Bullgaria dhe Maqedonia e Veriut, duke kombinuar forcat e vendeve që aspironin anëtarësimin e vendit tonë, por edhe të vendeve anëtare si Italia, Turqia apo Greqia, ka bërë të mundur një shkëmbim të vyer eksperiencash dhe aftësimin e FA për të marrë pjesë në misionet e NATO dhe të OKB.

Sigurisht, duke pasur parasysh ndryshimet e jashtëzakonshme që kanë ndodhur në FA të të gjithë vendeve anëtare, modernizimin dhe rritjen e kapaciteteve, aftësinë në rritje për të ndërvepruar në kuadër të NATO, në disa momente ka lindur edhe nevoja për të bërë ndryshime në mënyrën e funksionimit, apo strukturën e kësaj force shumëkombëshe.

Kjo arsyeja, përse vendet kontribuese e kanë parë të nevojshme që të sjellin një tjetër amendim të kontratës bazë, nëpërmjet këtij protokolli, i cili është Protokolli i Gjashtë Shtesë i SEEBRIG, i cili ka si synim të tij kryesor rritjen e fleksibilitetit të ndërveprimit të SEEBRIG me njësitë e tjera në operacione të NATO të BE dhe të OKB, si dhe rritjen e efikasitetit të funksionimit të forcës në përgjithësi. Pra pa prekur thelbin e saj, pra parimet mbi të cilat funksionon marrëveshja dhe qëllimin për të cilën ajo u krijua.

Këto ndryshime konsistojnë më së shumti në një përditësim të shpjegimit të termave, të mënyrës së funksionimit të brigadës SEEBRIG duke parashikuar edhe drejtimin e saj me rotacion, venddislokimin, etj. Pra, janë ndryshime që vinë si pasojë e ndryshimeve të mëdha që kanë ndodhur në mbarë rajonin dhe në modernizimin e rritjes se profesionalizmit të Forcave të të Armatosura të të gjithë vendeve anëtare.

Shqipëria tashmë prej dekadash ia ka dalë të shndërrohet në një faktor stabiliteti e sigurie në rajon, rol për të cilin ajo është vlerësuar vazhdimisht nga të gjithë aleatët dhe partnerët. Marrëveshje dhe iniciativa si SEEBRIG kanë luajtur padyshim një rol shumë të rëndësishëm në krijimin e këtij imazhi pozitiv për vendin tonë.

Prandaj unë i ftoj kolegët që ta miratojnë këtë projektligj, i cili vjen jo thjesht si një nevojë për modernizimin e një marrëveshje të suksesshme, por edhe si një angazhim i vendit tonë ndaj partnerëve.