Fjala e ministres së Mbrojtjes Olta Xhaçka në Takimin e Qeverisë së Shqipërisë dhe Qeverisë së Kosovës

e premte, 02 tetor 2020 12:32

Marrëveshja që firmosim sot mes dy Ministrive të Mbrojtjes për bashkëpunim dhe ndihmë të ndërsjellë në raste të fatkeqësive natyrore dhe fatkeqësive të tjera vjen si produkt i dëshirës sonë të dyanshme dhe i përputhjes së objektit të dy qeverive, për të forcuar bashkëpunimin për Mbrojtjen Civile, por mbi të gjitha është një marrëveshje, e cila do t' i bëjë qytetarët shqiptarë në të dy anët e kufirit më të sigurt përballë rreziqeve dhe kërcënimeve nga emergjencat, të cilat siç jemi dëshmitarë të gjithë janë kthyer në një sfidë të vërtetë gjatë viteve të fundit.

Unë besoj që bashkëpunimi dhe krijimi i sinergjive mes Shqipërisë e Kosovës është i natyrshëm dhe i dëshiruar në çdo fushë e sektor, por Emergjencat Civile, janë padyshim një fushë ku ky bashkëpunim është më i natyrshëm dhe më i lehtë për t'u realizuar se kudo tjetër. Kjo jo thjesht për shkak të interesit të përbashkët dhe përfitimeve të dukshme që kemi duke bashkuar forcat, apo të faktit që sfidat me të cilat përballemi për sa i përket menaxhimit të fatkeqësive natyrore, apo atyre të shkaktuara nga dora e njeriut, janë shumë të ngjashme, por mbi të gjitha sepse është një bashkëpunim që ngrihet mbi një traditë të konsoliduar e fisnike mes shqiptarëve këtej e andej kufirit për të ndihmuar njëri - tjetrin në raste vështirësish e rreziqesh. Tërmeti i 26 Nëntorit ishte veç shembulli më i fundit i kësaj tradite, kur Kosova ishte e para që nxitoi të na ndihmonte në momentin tonë të tragjedisë duke dërguar ekipe shpëtimi që në orët e para të asaj nate. 

Unë jam shumë optimiste që ne do të dimë të bashkëpunojmë në mënyrë efikase në përputhje me këtë marrëveshje që skicon kuadrin e përgjithshëm të bashkëpunimit në fushën e përballimit të emergjencave, duke filluar me planifikimin e masave parandaluese, ofrimin e ndihmës së ndërsjellë në kërkim - shpëtim dhe eliminimin e pasojave, apo në bashkëpunimin për rritjen e kapaciteteve logjistike, njerëzore e institucionale të strukturave të Mbrojtjes Civile. 

Më konkretisht, do të bashkëpunojmë ngushtë në dhënien e ndihmës, shkëmbimin e informacionit apo ekspertizës, përgatitjen e programeve të përbashkëta, kërkimin shkencor, furnizimin e pajisjen e ekipeve në terren, shkëmbimin e përvojave dhe praktikave më të mira, në planifikimin e përbashkët, e kështu me radhë. 

Shqipëria ka filluar tashmë një proces realisht ambicioz modernizimi e transformimi të Emergjencave Civile, duke kaluar një ligj të hartuar me mbështetjen e partnerëve. Kemi hedhur hapa të mëdha drejt modernizimit jo vetëm të strukturave, përmes ngritjes së Agjencisë së Mbrojtjes Civile, por edhe të bazës materiale, pajisjeve, mjeteve. Por mbi të gjitha kemi bërë shumë progres në transformimin e qasjes ndaj rreziqeve natyrore duke e kaluar fokusin nga reagimi tek parandalimi. 

Situata e shkaktuar nga tërmetet e vitit që shkoi, nga zjarret e shumta që kemi përjetuar gjatë këtij viti, e padyshim edhe nga pandemia na ka detyruar t'i përshpejtojmë planet e afatet, duke ia dalë që në vetëm një vit të arrijmë një nivel gatishmërie e operativiteti, që në planet fillestare do të kishte kërkuar së paku 4 apo 5 vjet, por sigurisht kemi shumë rrugë për të bërë akoma derisa struktura për të cilën po punojmë të jetë e standardeve që kërkohen për t'u anëtarësuar në Mekanizmin e BE për Mbrojtjen Civile.