Fjala e ministrit të Mbrojtjes, zotit Pirro Vengu me rastin e 112 - vjetorit të krijimit të Forcave të Armatosura të Republikës së Shqipërisë

e enjte, 05 dhjetor 2024 13:01

Fjala e ministrit të Mbrojtjes, zotit Pirro Vengu me rastin e 112 - vjetorit të krijimit të Forcave të Armatosura të Republikës së Shqipërisë, mbajtur në mjediset e garnizonit "Skënderbej".

Të nderuar gjeneralë, oficerë, nënoficerë, ushtarë dhe detarë, punonjës të Ministrisë së Mbrojtjes në të gjitha gradat dhe cilësitë tuaja,
të nderuar deputetë,
të nderuat përfaqësues të misioneve ushtarake,
zonja e zotërinj,

vendimi i Qeverisë së Vlorës, vetëm gjashtë ditë pas Shpalljes së Pavarësisë, për themelimin e Ministrisë së Luftës dhe Ushtrisë Kombëtare Shqiptare, më 4 Dhjetor 1912, nuk ishte vetëm një akt administrativ.

Etërit themelues të Shqipërisë moderne përcaktuan mbrojtjen dhe sigurinë si një çështje me rëndësi jetike për shtetin e sapoformuar. Sepse nuk mund të ketë pavarësi pa vetëmbrojtje dhe nuk mund të ketë shtet-ndërtim pa siguruar kushtet e vazhdimësisë.

Në këtë kuptim, themelimi i Forcave të Armatosura ishte një akt pavarësie të cilës i bashkëngjitej dhe misioni i sovranitetit.

Në fund të fundit, qoftë nëntori i parë në Krujë, nëntori i dytë në Vlorë, apo dhe Çlirimi i Kosovës, kanë qenë momente ku misioni gjente forcën dhe koalicionin e veprimit. Prandaj, ne bashkohemi sot në nderim dhe mirënjohje ndaj kontributit të gjithë atyre të cilët hodhën themelet dhe hapën rrugën e krijimit të ushtrisë moderne shqiptare dhe sakrifikuan gjithçka ndër breza, që shqiptarët sot të jetojnë të lirë.

Thuhet shpesh se Forcat e Armatosura janë pasqyra më e drejtë e gjendjes dhe aspiratave të një kombi. Dhe ka padyshim shumë të vërteta në këtë thënie. Mjafton të kujtojmë të gjitha ato momente në shekullin e kaluar, ku lajmëtari i parë i rrëzimeve në etapat shtet-ndërtuese të vendit tonë, ka qenë një shkurajim i forcave të armatosura apo një distancim i tyre nga elementët më vitalë të shoqërisë, që janë të rinjtë. Dhe është po aq e vërtetë që shpesh herë lajmëtari i parë i ringritjes, ka qenë një vetëdije kolektive për të vepruar, në mbrojtje, me mend dhe me armë, për të përcaktuar fatet, për të saktësuar vokacionin tonë.

Teksa përkujtojmë këto ditë 80 Vjetorin e Çlirimit të vendit tonë, vlen të nderojmë gjestin e rinisë shqiptare, i atij brezi bijsh të Pavarësisë dhe nipërish të Lidhjes së Prizrenit, të cilët sikundër bashkëmoshatarët e tyre në mbarë Evropën, i thanë Jo nazi-fashizmit, duke ringjizur misionin e sovranitetit me aspiratën e një shoqërie më të mirë.

Sot, 112 pas aktit të themelimit, 80 vite pas aktit të rezistencës, 15 vite pas aktit të konfirmimit të vokacionit tonë euroatlantik, teksa gëzojmë të gjithë së bashku të mirat e sigurisë kolektive, që ofron Aleanca më e suksesshme në historinë moderne ndërkohë që përballemi me kërcënime të reja, të cilat nuk janë vetëm në horizont por bëhen gjithnjë e më të prekshme, sot pra, na duhet të mendojmë për vazhdimësinë dhe për misionin, për kombin dhe aspiratat e tij. Sepse dedikimi ndaj misionit shoqërohet nga sakrifica të mëdha, ndaj ne, përulemi sot me respektin më të madh përpara ushtarakëve, që dhanë jetën në krye të detyrës në misionet tona paqeruajtëse në Afganistan dhe Letoni, si dhe i shprehim mirënjohjen më të veçantë familjarëve të tyre.
Sigurisht, që prej anëtarësimit në NATO dhe falë mbështetjes së gjithanshme të Shteteve të Bashkuara të Amerikës dhe ecjen me ritme gjithnjë e më të shpejta drejt anëtarësimit në BE, Shqipëria është shndërruar në një faktor të rëndësishëm të stabilitetit, paqes e sigurisë në rajon dhe shpesh herë larg rajonit tonë.
Në këto 10 vite, është bërë një punë e lavdërueshme dhe e gjithanshme për t’u forcuar, për t’u modernizuar. Por kemi ende shumë punë për të bërë.

Sot, ushtarët, nënoficerët, oficerët shqiptarë, janë më të përgatitur, më të mirëtrajnuar e arsimuar, më të mirëpajisur, dhe me të mirëtrajtuar. Në këtë kontekst, dua të shpreh mirënjohjen tonë të thellë, ndaj të gjithë aleatëve e partnerëve që kontribuan dhe vazhdojnë të kontribuojnë në modernizimin e Forcave tona të Armatosura.

Buxheti i Ministrisë së Mbrojtjes për vitin 2025, i miratuar ditën e djeshme në Kuvend, është më i larti në dy dekada, duke përmbushur jo vetëm angazhimin tonë kundrejt Aleancës, por duke mundësuar: trajtim financiar më dinjitoz, forcimin e kapaciteteve mbrojtëse dhe kapitalit njerëzor, ringritjen e Industrisë Ushtarake, krijimin e Forcës Rezerviste si edhe përmbushjen e të gjitha angazhimeve kombëtare dhe ndërkombëtare, veçanërisht ato të Mbrojtjes Civile dhe ato në kuadër të NATO.

Të nderuar ushtarakë,

Të nxitur nga krenaria, që na ushqen e shkuara dhe e tashmja, të gjithë ne së bashku, duhet të punojmë për të modernizuar dhe rritur më tej Forcat tona të Armatosura.

Gërshetimi i ekspertizës dhe inovacionit gjithnjë e më të madh në botën civile me kapacitetin kombëtar që ofrojnë vetëm Forcat e Armatosura janë një mundësi e re që na ofrohet për t’i dhënë një dimension tjetër edhe më të gjerë se ai ushtarak, forcës tonë të armatosur. Dhe jam i bindur se kjo është rruga më e drejtë, pasi të gjithë duhet të kontribuojmë për të nxitur modernizimin e Forcave të Armatosura jo vetëm në forcë luftimi, jo vetëm në infrastrukturë, por edhe në mënyrën e të menduarit dhe vepruarit.

Vetëm në këtë mënyrë, historia e FA në vitet e ardhshme do të jetë një histori suksesi, do të jetë historia e gjeneratës tjetër.

Urime 112 - vjetorin e krijimit të Forcave të Armatosura!

Gëzuar këtë ditë të veçantë, me mirënjohjen më të thellë për çdo sakrificë që keni bërë dhe vazhdoni të bëni për Shqipërinë dhe për kombin tonë!

Ju faleminderit!