I nderuar zoti kryetar i Kuvendit,
I nderuar zoti kryetar i Bashkisë,
Të nderuar deputetë,
Veteranë të Luftës Antifashiste Nacional-Çlirimtare,
Zonja e zotërinj,
Është një nder dhe privilegj për mua që jam sot këtu mes jush, në përvjetorin e Çlirimit të Lezhës, qytetit të bashkimit dhe besëlidhjes, ku historia e Shqipërisë ka lënë gjurmë të pashlyera, në përpjekje kundër çdo okupatori që ka kaluar në tokat tona.
Në këtë atmosferë, unë kam dhe kënaqësinë personale që ju drejtohem, duke qenë e zgjedhur si përfaqësuese e popullit lezhjan, duke ju njohur e punuar në ditë të mira e të këqija, por me konsideratën e respektin më të madh për ju, burrat dhe gratë e Lezhës me të cilët jemi gjendur në ditë të mira e të vështira.
Nuk dua për asnjë moment të lë mënjanë këtë ditë të Çlirimit të Lezhës nga okupatori nazi-fashist, përpjekjen heroike të bijve dhe bijave të kësaj toke, mundin dhe sakrificën e tyre për liri, përparim dhe zhvillim. Ju përshëndes të gjithë juve, familjarë të dëshmorëve të rënë për çlirimin e atdheut, si dhe ju veteranë të luftës sonë të madhe kundër okupatorit.
Por sot unë jam këtu për atë që po ndodh konkretisht në Lezhë dhe do të doja të ndaleshim gjatë për situatën e krijuar, përmbytjet e përhershme dhe masat që institucionet qendrore e vendore marrin në përballimin e tyre.
Jam e trishtuar që parmbrëmë tre persona të pafajshëm humbën jetën për shkak të përmbytjeve të shkaktuara në zonën e Lezhës. Duke shprehur ngushëllimet e sinqerta për familjarët e personave që humbën jetën, jam këtu për t’ju siguruar se qeveria shqiptare, dhe në veçanti Forcat e Armatosura kanë qenë dhe do të jenë kurdoherë në gatishmëri për përballimin e situatave emergjente.
Forcat e Armatosura, ishin të parat që iu përgjigjën Shtabit të Emergjencave duke dërguar forca, pajisje dhe mjete që në momentet e para që u informuam për rëndimin e situatës. Ju siguroj se Forcat e Armatosura do të jenë prezent në Prefekturën e Lezhës deri në normalizimin e plotë të situatës. Drejt Prefekturës së Lezhës, gjatë ditës janë nisur efektiva të Komandës së Mbështetjes, mbi 10 mijë thasë rërë, eskavatorë, zjarrfikës, fadroma, pompa uji, dhe gjithçka tjetër të nevojshme për përballimin e situatës.
Në këtë kontekst, ajo që doja të theksoja janë përpjekjet tona për marrjen e masave parandaluese në vend të atyre reaguese; koordinimin ndërinstitucional dhe me pushtetin lokal, hartimit të Planit Kombëtar të Kërkim Shpëtimit dhe Përballimit të Emergjencave dhe krijimit të kapaciteteve reale për t’i përballuar këto emergjenca.
Në Dokumentet Strategjike që kemi miratuar apo jemi në proces miratimi, Ministria e Mbrojtjes dhe Shtabi i Përgjithshëm i Forcave të Armatosura i kushton një vëmendje të veçantë Bashkëpunimit civilo-ushtarak; marrëdhëniet me komunitetin, sensibilizimin dhe ndihmën ndaj popullsisë në përballimin e fatkeqësive natyrore. Në këto momente shtabet e emergjencave janë fokusuar në normalizimin e situatës dhe në një moment të dytë do bëhen vlerësimet e dëmeve të shkaktuara nga përmbytjet.
Për 23 vjet me radhë, asnjë lopatë punë nuk është bërë për mbajtjen dhe përmirësimin e infrastrukturës, jo vetëm këtu në Lezhë, por në gjithë Shqipërinë. Prona publike është konsideruar mall pa zot dhe për këtë nuk do ndalem gjatë e nuk do të humbas kohë, as për t’u ankuar, as për të anatemuar njeri. Ju i dini më mirë se unë, i ndjeni dhe përjetoni çdo ditë pasojat e kësaj neglizhence të ngritur në sistem.
Ajo që unë dua të theksoj, është nevoja urgjente për ngritjen e strukturave permanente për përballimin e situatave emergjente. Në parim ne jemi shumë të avancuar, në legjislacion ndoshta konkurrojmë me vendet më të zhvilluara, por realiteti është i hidhur. Ne duhet të mendojmë seriozisht se si do t’i përballojmë ngjarje të tilla të përvitshme.
Dhe këtu unë kërkoj ndihmën e komunitetit. Jeni ju miq, nga ku duhet të nisë strukturimi i nevojave, kërkesave por dhe përballimit të fazës së parë të emergjencës. Jeni ju motra dhe vëllezër lezhjanë që keni eksperiencën shumëvjeçare tashmë të përmbytjeve dhe jeni në gjendje të identifikoni saktë mënyrat e zgjidhjes.
Nga vëllezërit tanë në Kosovë, dje pasdite mora konfirmimin se janë gjithnjë të gatshëm të na gjenden pranë në këtë situatë të krijuar, më çfarë nevojash e kërkesash që mund të kemi. Në emrin tuaj i falënderova dhe u ndjeva edhe më e qetë se këto situata nuk do t’i përballojmë të vetëm.
Një qeverisje demokratike nis nga qytetarët e përgjegjshëm të saj. Pres të dëgjoj më fort dhe më konkretisht zërin e komunitetit, jo vetëm për kërkesa e sugjerime, por për zgjidhje afatgjata. Në mbyllje, edhe njëherë më lejoni të shpreh respekt dhe mirënjohje për ata burra dhe gra, që nuk nguruan të sakrifikonin jetën për çlirimin e kësaj toke dhe gjithë Shqipërisë. Ne nuk harrojmë.
Faleminderit!
