Newsroom Fjalime të ministrit Fjala e ministres Kodheli me rastin e nisjes së stërvitjes "Joint Reaction 2015"
Gjeneral Bazo,
Të nderuar pjesëmarrës,
Së pari ju uroj mirëseardhjen në Tiranë dhe suksese në zhvillimin e Konferencës Fillestare Planëzuese të Stërvitjes “Joint Reaction 15”, në kuadrin e Iniciativës “SHBA-Karta e Adriatikut 5”.
Në kujdesin e drejtpërdrejtë të SHBA, Iniciativa “Karta e Adriatikut” u lançua në vitin 2003, fillimisht me 3 vendet e rajonit (Shqipëri, Kroaci dhe Maqedoni), dhe u ridimensionua në vitin 2008 duke përfshirë dhe Malin e Zi e Bosnjë-Hercegovinën, me synimin kryesor për të ndihmuar vendet aspirantë të bëheshin anëtarë me të drejta të plota të Aleancës.
Një objektiv tjetër shumë i rëndësishëm ka qenë dhe mbetet promovimi dhe fuqizimi i bashkëpunimit rajonal dhe sigurisë, rritja e ndërveprimit dhe adoptimi i standardeve, nëpërmjet stërvitjeve të përbashkëta dhe aktiviteteve të bashkëpunimit të njësive respektive.
Rezultatet e kësaj iniciative janë të dukshme e të prekshme, jo vetëm në aspektin politik dhe diplomatik me pranimin e Shqipërisë dhe Kroacisë në NATO në vitin 2009, por dhe në aspektin praktik e ushtarak me stërvitje e dislokime të përbashkëta në Afganistan në kuadrin e ISAF dhe së fundi në atë të misionit “Resolute Support”.
“Joint Reaction 2015” është stërvitja e parë e këtij lloji në rajonin e Ballkanit, dhe po ashtu e para e organizuar dhe e drejtuar nën kornizën e Kartës së Adriatikut (A5) duke synuar rritjen e ndërveprimit midis vendeve të rajonit, strukturave që merren me përballimin e emergjencave për të vlerësuar e përmirësuar efikasitetin e masave në këtë fushë.
Kjo stërvitje u ideua dhe konceptua vitin e kaluar, gjatë kryesimit të Kartës së Adriatikut nga Shqipëria, dhe jemi të lumtur që kontributi i Shqipërisë vazhdon në të gjitha aspektet, përfshirë dhe detyrimet si vend pritës dhe drejtues i saj.
Gjej rastin të falënderoj SHBA për ndihmesën e vazhdueshme dhe mbështetjen e dhënë nëpërmjet Komandës Amerikane në Europë (US EUCOM) për suksesin e këtij aktiviteti të rëndësishëm.
Fatkeqësisht rajoni i Ballkanit në këto dhjetëvjeçarët e fundit është dëshmitar i katastrofave të ndryshme natyrore apo njerëzore si përmbytjet, tërmetet, zjarret, aksidentet industriale, etj. me pasoja njerëzore dhe materiale të konsiderueshme.
Besoj fort në përpjekjet tona për marrjen e masave parandaluese në vend të atyre reaguese; koordinimin ndërinstitucional dhe me pushtetin lokal, hartimit të Planit Kombëtar të Kërkim - Shpëtimit dhe Përballimit të Emergjencave dhe krijimit të kapaciteteve reale për t’i përballuar këto emergjenca.
Në Dokumentet Strategjike që kemi miratuar apo jemi në proces miratimi, Ministria e Mbrojtjes dhe Shtabi i Përgjithshëm i Forcave të Armatosura i kushton një vëmendje të veçantë bashkëpunimit civilo - ushtarak; marrëdhëniet me komunitetin, sensibilizimin dhe ndihmën ndaj popullsisë në përballimin e fatkeqësive natyrore.
Nga ana tjetër, bashkëpunimi rajonal, ndihma që duhet t’i japim njëri - tjetrit duhet të ridimensionohet e forcohet akoma më shumë, duke “shembur mure” dhe “ndërtuar ura” veçanërisht në raste të katastrofave natyrore e njerëzore.
Pjesëmarrja në këtë stërvitje jo vetëm e të gjitha vendeve të Kartës së Adriatikut, por dhe vendeve të tjera të rajonit, është një tregues tjetër i vlerësimit, seriozitetit dhe gatishmërisë për të shkëmbyer eksperienca të vyera, kapacitete të përbashkëta, duke bashkëpunuar dhe ndihmuar njëri - tjetrin në situata emergjente.
Kontributi i Forcave të Armatosura në rastet e Emergjencave Civile, krahas strukturave të tjera shtetërore dhe atyre joqeveritare, në rastet e katastrofave natyrore dhe njerëzore është i patjetërsueshëm për vetë natyrën, kapacitetet, organizimin dhe eksperiencën e tyre.
Ju siguroj se Qeveria e Republikës së Shqipërisë nëpërmjet Ministrisë së Punëve të Brendshme, Ministrisë së Mbrojtjes dhe Shtabit të Përgjithshëm të Forcave të Armatosura, do të vejë në dispozicion asetet më të mira njerëzore, materiale dhe teknike për mbarëvajtjen e kësaj stërvitje të rëndësishme.
Ju faleminderit !
