Ministrja e Mbrojtjes, znj. Mimi Kodheli, do të nisë nesër një vizitë zyrtare dyditore në Ankara, Turqi, me ftesë të homologut të saj, ministrit të Mbrojtjes së Turqisë, z. Ismet Yilmaz.
Vizita e ministres Kodheli në Ankara do të nisë nesër më datë 13 shkurt me vendosjen e një kurore në Mauzoleumin e Mustafa Qemal Ataturkut.
Më pas ministrja Kodheli do të pritet në një takim të veçantë nga ministri i Mbrojtjes së Turqisë, z. Ismet Yilmaz.
Po nesër, ministrja Kodheli do të bëjë një vizitë në Shtabin e Përgjithshëm të FA të Turqisë dhe do të pritet në takim nga shefi i Shtabit të Përgjithshëm.
Gjatë qëndrimit në Turqi ministrja e Mbrojtjes Kodheli do të vizitojë Spitalin Ushtarak GATA në Ankara, ku do të takohet edhe me studentët ushtarakë shqiptarë që studiojnë atje.
