Qendra e Inovacionit të Sigurisë dhe Mbrojtjes

Qendra e Inovacionit të Sigurisë dhe Mbrojtjes (QISM) është një strukturë e re në fushën e Mbrojtjes dhe Sigurisë e cila ka si filozofi dhe mekanizëm kyç për progres dhe zhvillim inovacionin. Misioni i qendrës është nxitja e inovacionit dhe të gjitha proceset e lidhura me të nëpërmjet mbështetjes, monitorimit e vlerësimit të programeve, teknologjisë dhe projekteve që i përkasin fushës së Sigurisë dhe Mbrojtjes.

QISM synon avancimin e kapaciteteve të Sigurisë dhe Mbrojtjes përmes projekteve inovatore dhe integrimit të teknologjive bashkëkohore; nxitja e ekosistemit, afrimi i talenteve dhe mbështetja e startup - eve si edhe kultivimi i një mjedisi të qëndrueshëm dhe produktiv që inkurajon sinergjinë midis ideve inovative dhe realizimit efektiv në fushën e Sigurisë dhe Mbrojtjes; përmirësim i proceseve dhe operacioneve të brendshme, optimizimi i shpërndarjes së burimeve dhe matja e progresit; angazhim i vazhdueshëm për kërkim dhe zhvillim, ofrim të ekspertizës, ndarje të njohurive, dhe përfaqësim të QISM në skenën ndërkombëtare.

Qendra e Inovacionit të Sigurisë dhe Mbrojtjes është duke punuar në lidhje me projektet e propozuara nga Ministria e Mbrojtjes dhe Shtabi i Përgjithshëm. Këto projekte kanë në fokus përmirësimin dhe modernizimin e Forcave të Armatosura dhe drejtorive të ndryshme. Gjithashtu Qendra është duke punuar edhe me projekte në lidhje me emergjencat civile apo me Ministritë e tjera për të ofruar ekspertizën dhe mjetet e disponueshme për zgjidhjen e problematikave të cilat ndikojnë drejtpërdrejt me sigurinë dhe mbrojtjen e jetës të qytetarëve të Republikës së Shqipërisë.

Ekipi i Qendrës së Inovacionit të Sigurisë dhe Mbrojtjes përbëhet nga 16 punonjës civilë dhe ushtarakë dhe funksionon mbi bazën e një strukture të sheshtë horizontale të përbërë nga drejtori, stafi mbështetës dhe ekspertët. Këta të fundit ofrojnë ekspertizë në fusha të ndryshme veprimtarie, kontributi i së cilëve kompleton konceptimin, menaxhimin dhe zhvillimin e zgjidhjeve inovative në fushën e Sigurisë dhe Mbrojtjes.

Për më tepër hollësi, lutem vizitoni website e:

Qendrës së Inovacionit të Sigurisë dhe Mbrojtjes.