Rekrutimet te Mbrojtja ndahen në dy kategori kryesore: rekrutime ushtarake dhe rekrutime civile.
Rekrutimi ushtarak
1. Vendosja e kapitalit njerëzor si prioritet përmes përmirësimit të trajtimit financiar të ushtarakëve po reflektohet në rritjen e interesit të të rinjve për t’u bërë pjesë e Forcave të Armatosura, të cilat po shndërrohen në një strukturë tërheqëse për karrierë jo vetëm për të rinjtë nga jeta civile, por gjithnjë e më shumë edhe për ata që tashmë shërbejnë në uniformë.
Qendra e Personel Rekrutimi (QPR) është institucioni që ka në misionin e vet, ndër të tjera, edhe rekrutimin për t’u bërë pjesë e FA si ushtar/detar aktiv.
Si të bëhem pjesë e Forcave të Armatosura ...
2. Strukturat përgjegjëse përzgjedhin nga kategoria e ushtarit IV/detarit IV kandidatët për nënoficerë. Rekrutimi bëhet nëpërmjet konkurrimit të brendshëm. Kërkesa për të marrë pjesë në konkurrim i adresohet komandës së repartit ku ushtari IV/detari IV është duke kryer shërbimin. Ushtari IV/detari IV, që plotëson kriteret ndjek Kursin Fillestar të Nënoficerit pranë Qendrës së Arsimimit Profesional të Nënoficerëve (QAPN).
Të rinjtë dhe të rejat që bëjnë pjesë në FA po shprehin një interes të shtuar për të vijuar shërbimin duke ndjekur kurset e karrierës.
3. Gjithashtu QPR rekruton kandidatë për oficerë:
- me arsim të mesëm e të lartë brenda ose jashtë vendit për ndjekjen e studimeve në Akademitë Ushtarake të vendeve të NATO, në bazë të marrëveshjeve të bashkëpunimit dypalësh në fushën e arsimimit ushtarak,
- me arsim të lartë (minimumi bachelor) brenda ose jashtë vendit rekrutohet për plotësimin e nevojave për specialitete të FA
- për ndjekjen e studimeve brenda vendit mund të konkurrojnë edhe ushtarët/detarët dhe nënoficerët aktivë të FA, të cilët plotësojnë kriteret e përcaktuara nga ligji,
- me Kursin e Përgatitjes së Oficerit (KPO) në Akademinë e FA (AFA) për studentët, që kanë mbaruar minimumi studimet bachelor.
4. QPR, me miratimin e ligjit për komponentin rezervist, do të bëje dhe rekrutimin e rezervistëve, pra rekrutimin e shtetasve shqiptarë që dëshirojnë të japin kontributin e tyre për t’u bërë pjesë e FA si rezervistë.
Për çdo fazë rekrutimi, QPR hap procedurat për rekrutim për çdo kategori në website e MM www.mod.gov.al ku paraqiten kriteret dhe dokumentacioni i domosdoshëm për çdo kandidat, sipas çdo procedure standard.
Në të gjithë vendin funksionojnë Seksionet e Rekrutimit qark/rreth ku shtetasit marrin informacionin e duhur se si mund te bëhen pjesë e FA për çdo lloj kategorie (ushtar/detar; studime brenda dhe jashtë vendit apo komponentin rezervist).
5. Karriera ushtarake është ecuria në rendin e gradave dhe funksioneve gjatë kryerjes së shërbimit ushtarak aktiv, që ka të bëjë me kohë minimale të qëndrimit në një gradë, moshën maksimale të qëndrimit në shërbimin aktiv. Në Forcat e Armatosura gradat u jepen oficerëve, nënoficerëve, ushtarëve/detarëve, studentëve ushtarakë dhe ushtarakëve në rezervë. Hierarkia ushtarake përfshin rendin e gradave dhe të funksioneve në FA që shkallëzohet nga më i ulëti në më të lartin. Ushtarakët, në varësi të hierarkisë së funksioneve dhe gradave, janë eprorë dhe vartës.
Rekrutime për pozicione civile
6. Ministria e Mbrojtjes rekruton punonjës civilë, që nuk gëzojnë statusin e nëpunësit civil, procedurë standarde në bazë të urdhrit nr. 1090, datë 02.06.2016 “Për miratimin e politikës dhe procedurës së menaxhimit të personelit civil në FA, që nuk gëzojnë statusin e nëpunësit civil”, i ndryshuar.
Akti është hartuar për të udhëzuar rekrutimin, përzgjedhjen, trajtimin dhe zhvillimin e këtij personeli, duke siguruar që proceset të jenë të drejta, transparente dhe të bazuara në nevoja profesionale.
Kjo procedurë ka për qëllim të përmirësojë organizimin dhe menaxhimin e personelit civil që nuk është i statusit të nëpunësit civil, duke e integruar atë në strukturat e Forcave të Armatosura në mënyrë të qëndrueshme dhe efikase.
