12-13 shkurt 2014
Ministrja e Mbrojtjes, znj. Mimi Kodheli, zhvilloi një vizitë zyrtare dyditore në Ankara, Turqi, me ftesë të homologut të saj, ministrit të Mbrojtjes së Turqisë, z. Ismet Yilmaz
12 shkurt 2014
Në takim u nënvizua niveli shumë i mirë i marrëdhënieve mes dy vendeve tona, si dhe u diskutua për gjetjen e potencialeve për t’i çuar ato më tej. Ministri turk i Mbrojtjes tha se, Turqia e shikon Shqipërinë si një partnere të rëndësishme dhe aleat të madh të saj. Në këtë kontekst, në emër të qeverisë turke z. Yilmaz siguroi ministren Kodheli për mbështetjen e padiskutueshme të Turqisë për Shqipërinë për marrjen e statusit të vendit kandidat për BE.
Në Turqi janë arsimuar dhe kualifikuar 2500 studentë ushtarakë shqiptarë që nga viti 1992 e në vazhdim, ndërsa aktualisht në këtë vend studiojnë 86 të tjerë.
Homologët diskutuan edhe për projekte konkrete bashkëpunimi, rolin e Shqipërisë në çështjet rajonale, etj.
Kodheli u prit në një takim tejet të ngrohtë edhe nga shefi i Shtabit të Përgjithshëm, gjeneral armate Necdet Ozel.
Gjatë ditës së parë të vizitës, ministrja e Mbrojtjes, Kodheli, vendosi një kurorë me lule në mauzoleun e Mustafa Qemal Ataturkut.
Për më tepër ndiqni linkun: Ministrja e Mbrojtjes, Kodheli, vizitë zyrtare në Turqi
***
13 shkurt 2014
Gjatë ditës së dytë të vizitës, ministrja Kodheli, ishte e ftuar në Televizionin TRT Turk, ku edhe zhvilloi një intervistë. Pyetjet dhe përgjigjet gjatë kësaj interviste u fokusuan kryesisht në çështjet që kanë të bëjnë me: politikat e sigurisë kombëtare; rritjen dhe fuqizimin e mëtejshëm të marrëdhënieve midis dy vendeve tona; thellimin e mëtejshëm të marrëdhënieve midis Shqipërisë, Turqisë dhe NATO; marrëveshjen e bashkëpunimit të viteve 1992 – 2005; intensifikimin e marrëdhënieve në fusha të tjera; pritshmërinë e investimeve të huaja në fushën e sigurisë dhe në temën e BE.
Për më tepër ndiqni linkun: Intervista e ministres Kodheli, dhënë televizionit turk TRT
