Drejtoria e Përgjithshme e Rezervave Materiale të Shtetit

Drejtoria e Përgjithshme e Rezervave Materiale të Shtetit (DPRMSH) është një institucion kyç në menaxhimin e emergjencave civile dhe shërben si një garantor i sigurisë materiale të shtetit në kohë krize. Në situata të jashtëzakonshme, si fatkeqësi natyrore, kriza humanitare, apo çrregullime të tregut ekonomik, DPRMSH siguron mbështetje dhe stabilitet për të minimizuar ndikimin e këtyre situatave mbi popullsinë dhe ekonominë e vendit duke kryer shpërndarjen në kohë dhe të saktë të ndihmave.

Ky mision përmbushet nëpërmjet një sërë detyrash dhe funksionesh që e bëjnë këtë institucion një komponent të domosdoshëm të sistemit të emergjencave civile në Shqipëri.

Institucioni mbështet politikat kombëtare të sigurisë, duke përputhur aktivitetin e tij me strategjitë e mbrojtjes dhe emergjencave dhe kontribuon në ruajtjen e stabilitetit shoqëror në situata të vështira.

Rezervat Materiale të Shtetit u krijua për të ndërhyrë në mënyrë operative për mbrojtjen e popullsisë, të ekonomisë dhe mbrojtjen e vendit, në situata të gjendjes së jashtëzakonshme (kriza), gjendjes së emergjencës civile, veprimeve terroriste, veprimeve ushtarake (gjendje lufte), të cilat sjellin dëme të menjëhershme e të rënda për jetën, për shëndetin e popullatës dhe të gjësë së gjallë, për pasurinë, për trashëgiminë kulturore dhe për mjedisin.

Rezervat Materiale të Shtetit përdoren edhe për dhënien e ndihmave humanitare në përputhje me normat e së drejtës ndërkombëtare. 

Për të përmbushur misionin e saj, DPRMSH kryen një gamë të gjerë detyrash:

1. Sigurimi i rezervave të mjaftueshme dhe të përditësuara: Rezervat duhet të jenë të mjaftueshme për të përballuar situata të ndryshme, si fatkeqësi natyrore, kriza teknologjike apo ushtarake. Përditësimi i rezervave bëhet duke pasur parasysh standardet më të fundit të sigurisë dhe ndryshimet në nevojat e popullsisë.

2. Menaxhimi i qëndrueshëm dhe efikas: Planifikimi dhe monitorimi i përdorimit të rezervave për të shmangur abuzimet dhe për të maksimizuar efektivitetin. Rimbushja e rezervave në mënyrë të vazhdueshme për të siguruar gatishmëri të përhershme

3. Vlerësimi i nevojave të popullsisë: Analiza e ndryshimeve klimatike, demografike dhe teknologjike për të përcaktuar saktë nevojat e popullsisë në raste emergjente. Parashikimi i kërkesave për produkte të ndryshme që janë jetike gjatë krizave

4. Përmirësimi i kapaciteteve logjistike: Modernizimi i infrastrukturës së magazinimit dhe kushteve të ruajtjes për të garantuar sigurinë dhe integritetin e mallrave. Organizimi i trajnimeve për personelin që merret me menaxhimin dhe shpërndarjen e rezervave

5. Koordinimi ndërinstitucional: Bashkëpunimi me ministritë dhe njësitë lokale për të siguruar një reagim të harmonizuar dhe të shpejtë ndaj emergjencave. Shpërndarja e drejtë dhe efektive e rezervave materiale, në përputhje me prioritetet kombëtare dhe lokale

6. Mbështetja e strategjive kombëtare të sigurisë: Pajtimi i aktivitetit të DPRMSH me strategjitë kombëtare të mbrojtjes dhe emergjencave civile. Përgatitja për skenarë të ndryshëm krizash për të minimizuar ndikimin e tyre në shoqëri dhe ekonomi

7. Transparenca dhe llogaridhënia: Përdorimi transparent i rezervave dhe raportimi periodik mbi gjendjen dhe përdorimin e tyre. Vendosja e mekanizmave të kontrollit për të siguruar përdorimin e ligjshëm dhe të drejtë të burimeve