Ministri Vengu, në Ministerialin SHBA- Karta e Adriatikut (A-5): platformë e domosdoshme për sigurinë dhe stabilitetin në rajon

Ministri i Mbrojtjes, Pirro Vengu, mori pjesë në Ministerialin e SHBA- Karta e Adriatikut (A-5) në Sarajevë, një forum që bashkon Shtetet e Bashkuara të Amerikës dhe pesë vende të Ballkanit Perëndimor.
Pas këtij ministeriali, ministri Vengu u shpreh: "Ballkani Perëndimor ka ende shumë sfida të trashëguara dhe kërcënime të reja, të cilat kërkojnë partneritet më të ngushtë, investime në kapitalin njerëzor, në mbrojtje kibernetike, në industri, në pajisje dhe sisteme të përbashkëta".

Ministri i Mbrojtjes theksoi: "Me SHBA-në besojmë se kjo nismë rajonale është një platformë e domosdoshme, e cila duhet të orientohet drejt bashkëpunimit më efektiv në dobi të rritjes së qëndrueshmërisë së çdo vendi pjesëmarrës".

Në këtë kuadër, theksoi ministri Vengu, anëtarësimi i Kosovës në A5 është një nevojë strategjike.

Ministri i Mbrojtjes i Shqipërisë, rishprehu gatishmërinë e Shqipërisë për të kontribuuar plotësisht.

Iniciativa SHBA–Karta e Adriatikut (A-5) është një mekanizëm rajonal i bashkëpunimit në fushën e Mbrojtjes, themeluar më 2003 nga SHBA, Shqipëria, Kroacia dhe Maqedonia e Veriut për të mbështetur integrimin në NATO. Ndërsa më 4 dhjetor 2008 kësaj iniciative iu bashkuan edhe Mali i Zi dhe Bosnje-Hercegovina.