Miratohet në parim Buxheti për vitin 2026, ministri Vengu: Mundëson modernizimin e FA dhe ringritjen e industrisë ushtarake

e enjte, 20 nëntor 2025 15:05

Gjatë fjalës në seancën plenare për shqyrtimin në parim të Buxhetit të Mbrojtjes 2026, ministri i Mbrojtjes Pirro Vengu theksoi se ky buxhet shënon një kthesë të rëndësishme për modernizimin e Forcave të Armatosura, ringritjen e industrisë ushtarake shqiptare dhe forcimin e kapaciteteve të emergjencave civile.

Ministri Vegu u ndal në kontrastin mes periudhave kur mbrojtja ishte neglizhuar dhe situatës aktuale, ku investimi në siguri është kthyer në prioritet strategjik të shtetit: “Buxheti i Mbrojtjes 2026 do të mundësojë modernizimin e Forcave të Armatosura, ringritjen e industrisë ushtarake shqiptare, forcimin e emergjencave civile dhe rritjen e kontributit tonë në NATO dhe në sigurinë evropiane. Ky besim nuk buron nga fjalët, por nga vetë përmasat dhe orientimi i këtij buxheti: Me një rritje prej 12% krahasuar me vitin 2025; duke arritur 58,9 miliardë lekë, ose 2,12% të PBB. Ky nuk është vetëm një numër që plotëson një kriter të NATO. Është një zgjedhje politike dhe strategjike: t’i japim Mbrojtjes peshën reale që meriton në projektin tonë për Shqipërinë e vitit 2030" - theksoi ministri i Mbrojtjes.

Një pjesë e rëndësishme e buxhetit, plot 13 miliardë lekë, shkon për personelin me uniformë, duke përfshirë rritje pagash, përmirësim të kushteve të jetesës dhe zgjerim të mundësive të karrierës për të rinjtë që synojnë t’i bashkohen Forcave të Armatosura ose strukturave të Mbrojtjes Civile: “Me këtë buxhet, ne nuk japim thjesht rroga. Ne japim dinjitet, japim besim. Ne u themi të rinjve dhe të rejave që zgjedhin uniformën se shteti është me ta, jo vetëm me fjalë, por me buxhet. Dhe në qendër të këtij vizioni qëndron ripërtëritja e kapitalit njerëzor. Synimi ynë është të forcojmë lidhjen mes Rinisë - forcat më të gjalla të vendit - dhe Forcave të Armatosura si kapital njerëzor kombëtar. Do të orientojmë të rinjtë drejt mundësive profesionale civile brenda sistemit të mbrojtjes, por edhe drejt shërbimit në uniformë, si në komponentin aktiv, ashtu dhe në trupën rezerviste. Po hapim karrierën ushtarake dhe atë të ekspertëve të Mbrojtjes Civile për profesionistët e rinj përmes kurrikulave inovative, në bashkëpunim me arsimin e lartë dhe botën akademike. Një politikë moderne burimesh njerëzore që vendos në qendër aftësitë, disiplinën, vetëdijen historike dhe patriotizmin”, - u shpreh më tej ministri Vengu.

Ministri theksoi se 16,3 miliardë lekë do të përdoren për rritjen e gatishmërisë operacionale, nga pajisjet dhe uniformat, tek kapacitetet detare e ajrore, logjistika, stërvitja dhe misionet ndërkombëtare. Po ashtu, rreth gjysma e buxhetit - 29 miliardë lekë - janë investime kapitale që synojnë modernizimin teknologjik, zhvillimin e industrisë “Made in Albania” dhe dixhitalizimin e njësive të luftimit.

Vengu nënvizoi gjithashtu se Mbrojtja Kibernetike dhe Inovacioni do të jenë prioritet, ndërsa Industria Ushtarake vendase po shënon ringritje të dukshme, duke prodhuar municione, dronë, sisteme anti-dron dhe mjete të blinduara, si dhe duke krijuar vende të reja pune: “Shtylla kryesore e këtij buxheti, është industria 'Made in Albania', e cila po kthehet në realitet konkret: prodhim municionesh, dronë e sisteme anti-dron, pajime personale, mjete të blinduara. Për herë të parë, Mbrojtja nuk është vetëm shpenzim, por edhe burim të ardhurash dhe zhvillimi, duke gjeneruar 326 vende të reja pune e duke rikthyer miliona në ekonomi si prodhim, si paga dhe si investime", - nënvizoi ministri Vengu.

Në fushën e emergjencave civile, 4,3 miliardë lekë janë planifikuar për ngritjen e dy qendrave të reja rajonale, blerjen e dy avionëve zjarrfikës dhe forcimin e kapaciteteve të parandalimit dhe reagimit ndaj krizave.

Në mbyllje të fjalës së tij, ministri Vengu theksoi se ky buxhet përfaqëson vizionin për një shtet më të fortë, më të sigurt dhe më të besueshëm në sytë e qytetarëve dhe aleatëve.

Pas diskutimeve në një seancë maratonë, Buxheti për vitin 2026 u miratua në parim, me 83 vota pro dhe 32 kundër, rreth orës 03:00 të datës 20 nëntor.