“Së bashku të ndërtojmë të ardhmen e sigurt”, projektpilot midis FA dhe Shkollës Teknike Elektrike 'Gjergj Canco'”
Ministria e Mbrojtjes po i kushton vëmendje të veçantë rekrutimit në strukturat e saj të të rinjve me potenciale të larta dhe të mirëarsimuar. Sot, FA kanë në përdorim mjete moderne të teknologjisë së lartë dhe të fjalës së fundit të shkencës. Ato kërkojnë që personeli përdorues i këtyre sistemeve të jetë i mirëtrajnuar dhe i përshtatur me zhvillimet më të fundit të teknologjisë. Për këtë, krijimi i bashkëpunimit midis FA dhe shkollave të mesme profesionale të Tiranës është një mundësi nga e cila do të ketë përfitime të dyanshme. I tillë është edhe projekti pilot midis FARSH dhe Ministrisë së Mirëqenies Sociale dhe Rinisë (Shkollës Teknike Elektrike “Gjergji Canco”).
Qëllimi i këtij projekti është përzgjedhja dhe rekrutimi si ushtarë profesionistë në radhët e FA të elementeve më të mirë nga shkollat e formimit profesional, si dhe shfrytëzimi i mundësive që ofrojnë FA në mbështetje të strukturave shtetërore për stazhin profesional të këtyre të rinjve.
Në këtë kuadër, në ambientet e Agjencisë së Sistemeve të Ndërlidhjes dhe Informacionit (ASNI) u firmos marrëveshja e bashkëpunimit për këtë projekt pilot të quajtur “Së bashku të ndërtojmë të ardhmen e sigurtë”. Ishin të pranishëm ministrja e Mbrojtjes, znj. Mimi Kodheli, ministri i Mirëqënies Sociale dhe Rinisë, z. Erion Veliaj, shefi i Shtabit të Përgjithshëm i FA, gjeneralmajor Jeronim Bazo, drejtues dhe nxënës të Shkollës Teknike Elektrike “Gjergji Canco” etj.
Ministrja e Mbrojtjes Kodheli, duke marrë fjalën në këtë ceremoni theksoi se, ndihem mirë kur ndodhem midis të rinjsh. Dikur kam pasur fatin të mësoj shumë gjenerata dhe e di se sa e bukur është të jesh midis atyre që lexojnë çdo gjë, për të thithur çdo gjë dhe kjo është gjenerata juaj. Duhet shumë mund i shoqërisë, i një qeverisjeje për të krijuar një brez të ardhshëm të denjë për të drejtuar një vend. Nuk do të bëheni dhe nuk do të mund të bëheni në një ditë dhe as në një vit, por duhet që filizi të jetë i duhuri dhe toka të jetë mjaftueshmërish pjellore dhe të mund të kurohet nga ata që e kanë në dorë shansin e edukimit tuaj çdo ditë. Këtë mund ta bëjmë shpesh herë fare thjeshtë, qoftë edhe nga një marrëveshje si kjo e sotmja, në dukje modeste e në thelb e një rëndësie të veçantë dhe të jashtëzakonshme. “Kam pasur rastin të krijoj kontakte të drejtpërdrejta me maturantët e gjimnazeve të Tiranës. E kam bërë këtë edhe me një gjimnaz në Lezhë ku jam mentori i këtij gjimnazi, por e kam bërë edhe me Universitetin Politeknik të Tiranës, për të treguar në mënyrë të drejtpërdrejtë, duke i parë studentët dhe nxënësit në sy, se çfarë shansesh të jashtëzakonshme keni duke u punësuar në një strukturë siç janë Forcat e Armatosura. Dhe kjo për shumë arsye, mbi të gjitha arsyeja e mirëedukimit, shanseve që kjo strukturë krijon për t’u mirëedukuar qoftë brenda, qoftë jashtë vendit. Sigurisht duke përmbushur disa të dhëna, që jo domosdoshmërish i përmbushin vetëm djemtë, që ka të bëjë me të dhënat fizike, të dhënat e një shëndeti mendor të mirë që vetëm brezi juaj mund ta ketë ashtu si duhet. Duhet vetëm t’ia jepni vetes këtë shans dhe ta shtyni aspiratën dhe ambicien tuaj deri sa ta mendoni veten pjesë e Forcave të Armatosura”, ka nënvizuar ministrja e Mbrojtjes Kodheli.
Ndërsa ministri i Mirëqenies Sociale dhe Rinisë, z. Erion Veliaj u shpreh se më vjen mirë që një organizatë, siç është ushtria shqiptare, e cila është në NATO, hap dyert për atë që duhet të jetë aspirata jonë për të rinjtë shqiptarë, që është arsimi profesional. Ai falënderoi ministren e Mbrojtjes dhe shefin e Shtabit të Përgjithshëm të FA dhe të gjithë ata që kanë mundësuar këtë projektpilot, përmes së cilit të kemi akses ndoshta në aparatura dhe metodat më avangarde të komunikimit, që do të na bënte jo vetëm staf potencial për ushtrinë shqiptare, por sigurisht që mund të na përgatiste për sektorin privat dhe për të punuar jashtë vendit. “Ne bëjmë shumë sondazhe për të kuptuar se çfarë besimi kanë njerëzit tek institucionet dhe më vjen mirë që për të disatin muaj radhazi, institucioni që ka besimin më të lartë të publikut është ushtria shqiptare, ndaj më vjen mirë që edhe besimi ynë për arsimin profesional dhe për praktikat mësimore është tek ushtria shqiptare”, është shprehur ministri Veliaj.
Projekti pilot do të zhvillohet midis Forcave të Armatosura të Republikës së Shqipërisë dhe Ministrisë së Mirëqenies Sociale dhe Rinisë (Shkollës Teknike Elektrike “Gjergji Canco”). Grupe nxënësish të përzgjedhur nga kjo shkollë do të caktohen për të kryer praktikat mësimore në disa prej njësive të FARSH. Zhvillimi i këtyre praktikave nën drejtimin e personelit ushtarak do t’u japë mundësi nxënësve të njihen dhe familjarizohen me mjetet në përdorim të FA, si dhe do t’u jepet mundësia të riparojnë dhe vendosin në funksionim sistemet dhe pajisjet e dëmtuara ushtarake.
