Kremtohet 70 - vjetori i Shkollës së Mesme Ushtarake “Skënderbej”

e shtunë, 28 mars 2015 14:57

Foto Galeri

Në ambientet e garnizonit “Skënderbej” u zhvillua sot një aktivitet festiv me rastin e 70 - vjetorit të krijimit të Shkollës së Mesme Ushtarake “Skënderbej”. Në këtë veprimtari përkujtimore morën pjesë zëvendësministri i Mbrojtjes, z. Petro Koçi, shefi i Shtabit të Përgjithshëm i FA, gjeneral major Jeronim Bazo, gjeneralë dhe ushtarakë të lartë të Forcave të Armatosura, ish - ushtarakë që kanë kryer studimet ndër vite në shkollën “Skënderbej”, ish - mësues dhe punonjës që kanë punuar në këtë shkollë, si dhe mjaft të ftuar të tjerë.

Takimi përkujtimor u zhvillua në sallën e kinemasë, ku dikur ish - skënderbegasit organizonin veprimtari të shumta kulturore - artistike, shikonin filma dhe zhvillonin mjaft aktivitete të tjera.

Fjalën e hapjes e mbajti kryetari i Shoqatës Kombëtare “Skënderbegasi”, z. Mikado Shakohoxha, i cili foli mbi historikun e Shkollës Ushtarake “Skënderbej", që nga dita e krijimit më 28 mars 1945 dhe deri sa u mbyll në vitin 1992, për brezat dhe gjeneratat e nxënësve që edukoi dhe përgatiti kjo shkollë, e cila ishte fidanishtja e ushtrisë shqiptare.

Më pas, të pranishmit i përshëndeti zëvendësministri i Mbrojtjes, z. Petro Koçi, i cili theksoi se, është nder dhe emocion i veçantë, që në emër të Ministrisë së Mbrojtjes dhe personalisht të ministres Kodheli, të përshëndes ju skënderbegasit, pionierë dhe themelues të Shkollës së Mesme “Skënderbej”, shkollë që zë vend nderi dhe krenarie në historinë tonë ushtarake e veçanërisht në atë të arsmit ushtarak. “Si sot 70 vjet më parë, - vijoi zëvendësministri Koçi, - shkolla e shquar “Skënderbej” çeli portat e saj për t'u shndërruar më pas në një institucion dinjitoz e prestigjioz të përgatitjes dhe arsimimit të kuadrove të ardhshëm të ushtrisë tonë”.

Duke folur për vlerat e kësaj shkolle dhe të gjeneratave të nxënësve të saj, z. Koçi nënvizoi se, pavarësisht moteve të vështira politike që ka kaluar vendi, ju keni ditur me mençuri dhe patriotizëm të vërtetë të rreshtoheshit me dinjitet në krah të idealeve për të ndërtuar një Shqipëri të re euroatlantike. “Më lejoni që në këtë ditë feste dhe mirënjohjeje t’ju uroj shëndet e lumturi në familjet tuaja, si dhe ta ruani e ta transmetoni ndër breza frymën e unitetit të komunitetit të nderuar ushtarak”, -  përfundoi fjalën e tij zëvendësministri i Mbrojtjes Petro Koçi.

Në këtë  takim mbresëlënës folën dhe sollën kujtimet e tyre edhe disa ish - skënderbegas të tjerë si Mehdi Ramohita, gjeneral major ® Kostaq Karoli, mësuesi i matematikës dhe ish - skënderbegasi Shkëlqim Dervishi etj, ndërsa ish - skënderbegasit Bashkim Kozeli dhe Shpend Topollai recituan poezi kushtuar shkollës së tyre “Skënderbej”.

Në fund të takimit, zëvendësministri i Mbrojtjes z. Petro Koçi dhe shefi i Shtabit të Përgjithshëm, gjeneral major Bazo i dorëzuan një numri të konsiderueshëm ish - skëndebegasish “Medaljen e Mirënjohjes”, akorduar nga ministri i Mbrojtjes me rastin e 70 - vjetorit të shkollës ushtarake “Skënderbej”.

Shkolla e mesme ushtarake “Skënderbej” u çel me 28 mars 1945, pak muaj kur Shqipëria ishte çliruar nga pushtuesit nazi - fashistë. Qysh në dhjetor 1944, Shtabi i Përgjithshëm i UNÇSH, i kishte dërguar njësive ushtarake një letër që të përzgjidhnin partizanët e vegjël, 12 - 15 vjeçarë, për t’i dërguar në shkollën ushtarake, e cila do të hapej së shpejti pranë garnizonit ushtarak në fund të rrugës së Dibrës, afër spitalit civil. Nxënësit e saj të parë do të ishin partizanët e vegjël, djemtë e dëshmorëve të luftës, fëmijë në nevojë dhe pa prindër nga të gjithë krahinat e vendit. Fillimisht ishin rreth 300 - 400 partizanë të vegjël, të cilët u ulën në 'bangot' e shkollës të sapoformuar, e cila u quajt “Shkolla e Pionierëve të Luftës”. Pas dy vitesh, me vendim të posaçëm, ajo do të quhej shkolla e mesme ushtarake “Skënderbej”.

Që nga 28 marsi i vitit të largët 1945 kjo shkollë do të bëhej simbol i nderit dhe i krenarisë të Ushtrisë Shqiptare, një fidanishte e vërtetë ku u edukuan dhe u brumosën me cilësitë e virtytet më të larta breza të tërë djemsh të ardhur anëkend Shqipërisë për t’i shërbyer më pas me devotshmëri të lartë atdheut dhe popullit të tyre. Me kohë numri i nxënësve filloi të rritej nga viti në vit duke arritur kuota deri edhe në 1500 - 2000 nxënës që mësonin dhe përgatiteshin për dije të përgjithshme arsimore dhe ushtarake.

Pas vitit 1960 u hapën edhe degë për edukimin në profesione të ndryshme si mjekësi, mekanikë, elektrike, ndërtim, ekonomike, muzikë dhe nxënësit e caktuar në këto degë e zhvillonin procesin mësimor në shkollat e mesme të profileve përkatëse në kryeqytet. Gjatë ekzistencës së saj afër 60 vjeçare kjo shkollë u përfshi në të gjithë sektorët e jetës mbarëkombëtare, ajo u bë një shkollë shumëdimensionale në rang republike.

Nga kjo shkollë kanë dalë kuadro jo vetëm ushtarakë të të gjitha rangjeve, por edhe mjaft kuadro që kontribuan në shkencë, diplomaci, kulturë, ndërtim, arsim etj. Në këtë 70 - vjetor të Shkollës së Mesme Ushtarake “Skënderbej” është rasti për të kujtuar me dashuri dhe respekt armatën e nxënësve të saj që u bënë komandantë dhe komisarë të zotë të njësive dhe reparteve të Ushtrisë Shqiptare dhe që shërbyen me devotshmëri e përgjegjësi të lartë për mbrojtjen e atdheut tonë.