113 vite Forca të Armatosura, ministri Vengu: Fati i Shqipërisë, i lidhur me atë të FA

Në Muzeun e Forcave të Armatosura në Bërzhitë u zhvillua ceremonia zyrtare e 113-vjetorit të krijimit të Forcave të Armatosura të Republikës së Shqipërisë. Të pranishëm në ceremoni ishin ministri i Mbrojtjes, Pirro Vengu, zëvendësministri Enkelejd Joti, shefi i Shtabit të Përgjithshëm të FA, gjenerallejtnant Arben Kingji, si dhe qindra ushtarakë të strukturave të ndryshme të FA.

Fotogaleria

Në fjalën e tij, ministri Vengu theksoi domethënien historike të themelimit të ushtrisë shqiptare, duke e cilësuar si një akt vendimtar të Etërve të Kombit. “113 vite më parë, Shqipëria e kishte flamurin, kishte rigjetur kushtet e mëvetësisë në një kontekst evropian, por ishte ende në kërkim të një uniforme”, - u shpreh ai.

Ministri vuri në dukje se krijimi i Forcave të Armatosura ishte një vendim i marrë pa garanci dhe me shumë rreziqe, por mbi parimin se: “një popull pa mbrojtje është i pambrojtur nga historia”. Sipas tij, “Ngritja e Flamurit shpalli Pavarësinë, ndërsa Themelimi i Ushtrisë ngriti mburojën e saj”.

Duke përshkuar sfidat e një shekulli, nga luftërat dhe diktatura deri tek rikthimi në familjen evropiane, ministri nënvizoi se Shqipëria ka pasur gjithmonë njerëz të cilët besuan se atdheu mbahet me mendje, disiplinë dhe sakrificë. “Fati i Shqipërisë dhe fati i FA janë të lidhura. Në 1912 ishin domosdoshmëri për të mbijetuar. Sot janë domosdoshmëri për të ecur përpara”, - theksoi ai.

Ai rikujtoi se siguria mbetet sfida kryesore e kohës, e cila kërkon investim, teknologji dhe kapital njerëzor. “Siguria nuk është asnjëherë e dhënë. Prandaj fokusi ynë është i qartë: kapitali njerëzor, kapacitetet luftarake dhe modernizimi teknologjik”. - deklaroi Vengu.

Ministri evidentoi se vetëm brenda një viti, FA formojnë mbi 800 të rinj, duke i konsideruar ata si një nga motorët kryesorë të zhvillimit shoqëror: “Ushtarakët tanë janë linja e parë e sigurisë. Ata janë garancia që Shqipëria ecën përpara pa frikë”, - tha ai.

Duke folur për rolin e Shqipërisë në NATO, ministri theksoi se vendi është i sigurt, jo për shkak të madhësisë, por për shkak të përkushtimit të njerëzve në uniformë: “16 vite pas hyrjes në NATO, Shqipëria është e sigurt sepse aleatët na besojnë. Këtë e pashë edhe në Bosnje e Hercegovinë, në takimin me ushtarakët tanë që shërbejnë aty”, - u shpreh ai.