Prej 1 korrikut 2019 Shqipëria ka marrë kryesimin e Sekretariatit të Ministerialit të Mbrojtjes së Evropës Juglindore (SEDM), por këto ditë u bë edhe ceremonia e dorëzimit të Sekretariatit nga Greqia.
Ambasadori Eleftherios Anghelopoulos i dorëzoi simbolikisht zëvendësministrit të Mbrojtjes z. Petro Koҫi flamurin e SEDM, teksa ishte i pranishëm në ceremoninë e organizuar me rastin e 20 - Vjetorit të Brigadës së Europës Jug-Lindore (SEEBRIG).
Në cilësinë edhe të kryetarit të Sekretariatit të SEDM, zëvendësministri i Mbrojtjes Petro Koçi theksoi në fjalën përshëndetëse se Shqipëria është gjithmonë e më shumë e angazhuar për të kontribuar në sigurinë, paqen dhe zhvillimin e dialogut në rajon. Për këtë arsye zëvendësministri Koçi përmendi faktin se Shqipëria është pjesë e shumë iniciativave rajonale, një pjesë të të cilave edhe e kryeson.
Sa i përket zhvillimeve në rajon, zëvendësministri i Mbrojtjes u shpreh se zgjidhja e çështjes së emrit të Maqedonisë së Veriut është meritë e kësaj të fundit dhe e Greqisë, çka ndikon më së miri dhe në zgjidhjen e disa çështjeve teknike dhe brenda SEDM.
Sipas zëvendësministrit "edhe vende të tjera të rajonit duhet ta përdorin këtë rast si një shembull të mirë për të rritur bashkëpunimin dhe për të demonstruar se interesat për të ardhmen duhet të mbizotërojë mbi memorien e të kaluarës".
Zëvendësministri Petro Koҫi shprehu angazhimin e Ministrisë së Mbrojtjes së Republikës së Shqipërisë për të përmbushur të gjitha angazhimet gjatë kryesimit të SEDM, si dhe duke e orientuar këtë iniciativë drejt sfidave të reja.
