Rreth 100 mjete dhe 320 trupa të Batalionit II të Këmbësorisë (b2k) të Forcës Tokësore testuan kapacitetet dislokuese duke u zhvendosur brenda ditës nga baza e tyre në Zall - Herr, për në Arshi Lengo të Gjirokastrës.
Qëllimi kryesor i kësaj stërvitjeje ishte rritja e aftësive të Shtabit të b2k në planëzimin dhe zhvillimin e planeve për kryerjen e dislokimeve nga rajoni i përqendrimit të përhershëm, për në rajonin e përqendrimin të përkohshëm, për të marrë detyra operacionale sipas urdhrave dhe udhëzimeve për operacionet luftarake dhe joluftarake.
Testimi i kapaciteteve dislokuese të Batalionit II të Këmbësorisë, vjen edhe si rrjedhojë e të qenit pjesë e rezervës operacionale të misionit të NATO në Kosovë, KFOR.
Gjatë lëvizjes mbi 230 km larg rajonit të përqendrimit të përhershëm, trupat e b2k testuan aftësitë edhe për zënien dhe sigurimin e pikave kyçe të terrenit gjatë lëvizjes.
Përveç efektivëve të b2k, u testuan edhe kapacitetet e strukturave ndihmëse si Komanda Mbështetëse dhe Policia Ushtarake.
Stërvitja e koduar “Shqiponja 19-02”, kishte për qëllim edhe bashkëpunimin me autoritetet e pushtetit vendor dhe rritjen e besimit të popullsisë lokale ndaj Forcave të Armatosura.
Për këtë qëllim, trupat pjesëmarrës në stërvitje organizuan një ditë të hapur në sheshin “Çerçiz Topulli” në qytetin e Gjirokastrës ku u ekspozuan mjetet, armatimet dhe pajisjet në përdorim nga Forcat e Armatosura. Në ditën e hapur në Gjirokastër mori pjesë shefi i Shtabit të Përgjithshëm të FA gjeneral brigade Bardhyl Kollçaku, i cili shoqërohej nga kryetari i bashkisë Flamur Golemi dhe komandanti i Forcës Tokësore gjeneral brigade Albert Mullai. Gjeneral brigade Kollçaku përgëzoi trupat për organizimin e këtij aktiviteti, ndërsa kryebashkiaku Golemi falënderoi FA për angazhimin në ndihmë të popullsisë gjatë emergjencave civile.
Më herët, efektivët e b2k ndërhynë për rehabilitimin e mjediseve sportive në shkollën e mesme të bashkuar “Bilal Golemi” në njësinë administrative Cepo.
Gjithashtu Qendra e Personel Rekrutimit ishte e pranishme për të informuar të rinjtë gjirokastritë për mundësitë që ofrojnë FA për t’u punësuar dhe për të shërbyer nën uniformë.
VIDEO:
© Ministria e Mbrojtjes 2024 - Të gjitha të drejtat e rezervuara.