Kursantët e Kursit të Lartë të Oficerit përfunduan Stërvitjen e Komandës së Shtabit, “Veleçiku 20”.
Stërvitja u zhvillua në dy faza, e para pranë Akademisë së Forcave të Armatosura në Tiranë dhe e dyta rikonicion në terren të hapur, në Velipojë.
17 kursantët, mes të cilëve 5 zonja, testuan për rreth 1 javë aftësitë për t’u organizuar si shtab i një force të përbashkët, për të analizuar situatën politiko - ushtarake në periudha krize dhe konflikti.
Nënkolonelët testuan gjithashtu njohjen dhe zbatimin e procesit të vendimmarrjes ushtarake në nivel operacional, si dhe përvetësimin e koncepteve bazë të drejtimit të Forcave të Armatosura në nivelin operativo-strategjik.
Nën drejtimin e pedagogëve të Departamentit të Operacioneve, kursantët u angazhuan për arritjen e objektivave të stërvitjes, si kuptimin e planëzimit operacional në një skenar të mundshëm krize apo konflikti; unifikimin e metodave dhe procedurave të punës për organizimin dhe planëzimin e operacioneve të përbashkëta, si dhe koordinimin midis fushave bazë në një shtab dhe midis komponentëve përbërës në operacion, etj.
Pjesë e Kursit të Lartë të Oficerit për këtë vit akademik janë edhe 2 ushtarakë nga Forca e Sigurisë së Kosovës.
Stërvitja “Veleçiku 20” është pjesë e programit mësimor të Kursit të Lartë të Oficerit për vitin 2019 - 2020.
