Newsroom Xhaçka e Veliaj inspektojnë tregjet në Tiranë: Ndëshkim shkelësve, të ruajmë atë që kemi arritur
Pak ditë pasi u vendosën masat e reja në tregje, ministrja e Mbrojtjes Olta Xhaçka së bashku me kryetarin e Bashkisë së Tiranës Erion Veliaj inspektuan tregun e fruta zarzavateve në Kombinat, por edhe disa nga pikat e tjera në kryeqytet.
Në të gjitha tregjet e inspektuara është vënë re sensibilizim i qytetarëve në ruajtjen e distancës dhe mbajtjen e radhës, sipas parametrave të përcaktuar.
Teksa shprehu mirënjohjen për mbi njëmijë efektivë të angazhuar si në terren për shpërndarjen e pakove ushqimore ashtu edhe në 70 postblloqe apo tregje, ministrja e Mbrojtjes u shpreh: “Sigurisht masat deri më tani kanë pasur një rezultat jashtëzakonisht të mirë, një rezultat fantastik, por kjo nuk duhet të na bëjë të humbasim vëmendjen. Mendoj se ndëshkimi i të gjithë atyre që nuk i respektojë rregullat duhet të vazhdojë të jetë i posaçëm, qoftë me masa administrative apo gjoba, qoftë me arrest me burg në varësi të veprës, por kjo është shumë e rëndësishme në mënyrë që të vazhdojmë të ruajmë çfarë kemi arritur deri më tani në veprimtarinë e jetës së qytetarëve të Tiranës në veçanti, por dhe të gjithë Shqipërisë”.
Ministrja e Mbrojtjes dhe kryebashkiaku i Tiranës kërkuan nga qytetarët respektimin e masave, ndërsa deklaruan mbështetjen për efektivët e Forcave të Armatosura, Policisë së Shtetit dhe Policisë Bashkiake.
