116 vajza dhe djem u betuan në Shkollën e Trupës në Bunavi si ushtarët më të rinj të Forcave të Armatosura të Shqipërisë.
Betimi i ushtarëve të rinj erdhi pas përfundimit me sukses të Stërvitjes Individuale Bazë, e cila kësaj radhe u zhvillua në kushte jo të zakonshme, për shkak të pandemisë.
Rekrutët e rinj u testuan për COVID-19 në Tiranë përpara nisjes së stërvitjes dhe gjatë qëndrimit në Shkollën e Trupës në Bunavi, iu nënshtruan kontrolleve periodike mjekësore.
Pjesët e programit stërvitor që zakonisht zhvillohen në klasa apo palestër, u improvizuan në mjedise të hapura, ndërkohë që edhe akomodimi i rekrutëve u bë duke respektuar masat kundër përhapjes së pandemisë.
Ushtarët e sapo betuar iu nënshtruan tre periudhave të stërvitjes, asaj të gjelbër, blu dhe të kuqe.
Ushtarët e rinj i përgëzoi edhe shefi i Shtabit të Shkollës së Trupës, nënkolonel Bujar Fejzo, i cili falënderoi edhe personelin trajnues. “Kjo ditë është e veçantë, pasi u betuan si ushtarakë të Forcave të Armatosura të Republikës së Shqipërisë, para flamurit tonë kombëtar, për t’i qëndruar besnik atdheut, detyrës dhe ligjit. Ndihemi krenar për produktin e punës suaj, për këtë forcë të madhe ushtarake që keni stërvitur, për përpjekjet e vazhdueshme tuaja në drejtim të konsolidimit të sistemit të stërvitjes së ushtarit të Forcave të Armatosura, për ambicien tuaj për të zbatuar standarde të avancuara në procesin stërvitor, për gjithçka që ju keni bërë për edukimin e këtyre të rinjve, tashmë të denjë për të shërbyer në radhët e Forcave të Armatosura".
Pas betimit dhe titullimit si ushtarë apo detarë të Forcave të Armatosura, efektivët e rinj do të emërohen në forcat apo komandat e ndryshme.
