Në Ministrinë e Mbrojtjes u zhvillua sot, ceremonia e gradimit të zëvendësshefes së Shtabit të Përgjithshëm të Forcave të Armatosura, Manushaqe Shehu me gradën “gjeneralmajor”.
Ajo është e para grua ushtarake që mban gradën më të lartë në Forcat e Armatosura të Shqipërisë.
Gjatë ceremonisë, ministri i Mbrojtjes Niko Peleshi vlerësoi kontributin e gjeneralmajor Manushaqe Shehut, duke theksuar se ky është një vlerësim për arritjet e saj në karrierë. Ministri Peleshi vuri në dukje detyrat e rëndësishme që ajo ka kryer, përfshirë këtu edhe detyra me rëndësi sensitive.
Zëvendësshefja e Shtabit të Përgjithshëm të FA, gjeneralmajor Manushaqe Shehu, falënderoi autoritetet e larta të Shtetit për vlerësimin e dhënë, duke premtuar se do të punojë me përkushtim e profesionalizëm që t’i shërbejë Forcave të Armatosura dhe vendit me mbështetjen e shefit të Shtabit të Përgjithshëm të FA, gjeneralmajor Bajram Begaj dhe ministrit të Mbrojtjes Niko Peleshi. Ajo u bëri thirrje grave dhe burrave nën uniformë se me punë të palodhur dhe përkushtim mund të promovohen në gradë.
Gjeneralmajor Manushaqe Shehu është titulluar oficer në vitin 1984 dhe në karrierën e saj të gjatë prej 37 vjetësh në uniformë ka shërbyer në disa detyra dhe funksione.
Më 14 nëntor 2016 ajo u gradua “gjeneral brigade”, me dekret të presidentit të Republikës, ndërsa tashmë ajo mban gradën më të lartë gjeneralmajor.
© Ministria e Mbrojtjes 2024 - Të gjitha të drejtat e rezervuara.