Efektivë të Flotiljes Detare zhvilluan për dy ditë me radhë, stërvitjen "GRUPEX 21". Pjesë e stërvitjes ishin tetë anije. “GRUPEX 21” ka si synim certifikimin e kapaciteteve të grupeve patrulluese.
Gjatë kësaj stërvitjeje u përpunuan elementët e manovrimit taktik, operacioneve të embargos detare, operacioneve të kërkim-shpëtimit dhe elementë të stërvitjes së furnizimit në det.
Në këto dy ditë u zhvilluan edhe qitjet bregdetare të cilat ishin të ndërthurura me stërvitjen “GRUPEX 21” si pjesë e një skenari të përgatitur nga Shtabi i Flotiljes Detare në përputhje me qëllimin e operacioneve të sigurisë detare në detin Adriatik dhe Jon.
Stërvitja GRUPEX dhe qitjet bregdetare shërbyen për kompaktësimin e veprimeve të anijeve të Flotiljes Detare në nivel grupi. Qitjet bregdetare u zhvilluan në ishullin e Sazanit, me armatimin e anijeve në poligonin e vetullores në pjesën perëndimore të Karaburunit.
Stërvitja GRUPEX dhe qitjet bregdetare u ndoqën nga komandanti i Forcës Detare, gjeneral brigade Ilir Xhebexhia, shefi i Shtabit të Forcës Detare, komandanti i Flotiljes Detare dhe përfaqësues të shtabit të Forcës Detare, të cilët ishin të imbarkuar në bord të anijes Butrinti për gjatë dy ditëve.
