Shqipëria mbetet një aleate e denjë e NATO dhe partnerëve strategjikë. Ky vullnet është theksuar nga ministri i Mbrojtjes Niko Peleshi, gjatë bisedës me ministrin e Mbrojtjes së Republikës së Letonisë Artis Pabriks, i cili ndodhet në Tiranë për një vizitë zyrtare.
Ministri i Mbrojtjes Peleshi vuri në dukje faktin se Shqipëria iu përgjigj menjëherë thirrjes së NATO dhe kontribuoi me trupa në kuadër të Prezencës së Përparuar të Përforcuar (eFP) të NATO, në kufirin e saj lindor që prej vitit 2017, ndërsa kontingjenti shqiptar EOD mbetet i angazhuar krah për krah me forcat e Aleancës, si pjesë e grupbatalionit shumëkombësh, të drejtuar nga Kanadaja. Ministri Peleshi përmendi incidentin tragjik që ndodhi në “Kamp Adazi”, ku humbën jetën dy ushtarakët tanë, major Klodian Tanushi dhe nëntetare Zarife Hasanaj, ngjarje e cila forcoi edhe më shumë lidhjen midis dy vendeve.
Gjatë bisedës me homologun letonez, ministri i Mbrojtjes Niko Peleshi foli edhe për ngjarjet në Afganistan, ku Shqipëria vendosi të dalë në krah të SHBA.
‘‘Vendi ynë mbështeti vendimin e NATO për të tërhequr trupat nga Afganistani. Sidoqoftë, duke pasur parasysh zhvillimin e fundit, ne nuk mund të bënim më shumë sesa të riafirmonim angazhimin tonë. Shqipëria është e gatshme dhe nuk ka asnjë hezitim për të përballuar pjesën e saj të barrës. Një peshë që, për mendimin tonë, duhet të mbahet gjithashtu nga vendet e tjera të Aleancës. Deri më këto ditë kanë gjetur strehim në vendin tonë mbi 600 qytetarë afganë dhe kemi shprehur qartë vullnet të plotë dhe gatishmërinë për të pritur edhe të tjerë në nevojë’’.
Më tej, ministri Peleshi u shpreh se sfidat tona të sigurisë mbeten të përbashkëta, të pandashme dhe të gjithanshme. Ato vijnë nga çdo drejtim dhe mund të cenojnë sigurinë dhe stabilitetin në rajonin tonë dhe më gjerë.
Ministria e Mbrojtjes së Shqipërisë vlerëson dislokimin e Forcave të Armatosura letoneze në misionin e KFOR, në Kosovë, si një kontribut të madh për stabilitetin e Ballkanit Perëndimor. Sipas ministrit Peleshi, mbështetja e Kosovës në aspiratat e saj kundrejt anëtarësimit në organizatat ndërkombëtare, duke kontribuar në forcimin e paqes dhe sigurisë, inkurajon zhvillimin e rajonit dhe frenon zgjerimin e influencës të vendeve të tjera që sfidojnë demokracinë në vendet e Ballkanit Perëndimor.
© Ministria e Mbrojtjes 2024 - Të gjitha të drejtat e rezervuara.