Newsroom Fjalime të ministrit Përshendetja e ministres së Mbrojtjes, Mimi Kodheli drejtuar nxënësve të shkollave të mesme të Tiranës
Përshëndetje të gjithëve dhe mirë se keni ardhur midis nesh!
Ushtarakët janë shumë më të disiplinuar se ne civilët, prandaj përpara se unë t’ju përshëndes dhe t’ju uroj mirëseardhjen, dua të falënderoj gjeneral Bazon për fjalën e mbajtur midis jush si dhe zëvendësministrin për prezencën e tij, por unë dëshiroj që në vëmendjen tuaj, t’ju sjell sa më poshtë:
Gjeneral Bazo me të drejtë përmendi faktin se në cilin gjimnaz është formuar. Unë kam mësuar në gjimnazin “Sami Frashëri”. Ndërkohë që unë isha në gjimnazin “Sami Frashëri”, ai e linte pas liste gjimnazin “Partizani”. Nuk e di sot çfarë ndodh, por mendoj se ministrja Nikolla i ka bërë vlerësimet dhe nuk e di kë ka vendosur në vend të parë. “Ismail Qemalin”? Edhe ky ka qenë pas nesh, në vendin e tretë. Por, përtej “Sami Frashërit”, “Partizanit”, “Petro Ninit”, “Qemal Stafës”, për të gjithë gjimnazet e tjera të rilindura apo të krijuara para e pas viteve 1990, është kaq e rëndësishme ajo që tha gjeneral Bazo. Ju duhet të përgatiteni për të dhënë më të mirën. Keni të gjitha mundësitë për ta dhënë më të mirën. Është absolutisht në besimin tonë se brezi i ri që ka lindur pas viteve 1990 mund dhe duhet të jetë shpresa e vetme e Shqipërisë dhe e shqiptarëve. Ndaj, për ta bërë këtë të mundur ka disa mundësi, ka disa shanse. Në radhë të parë, është puna juaj, ajo që ju bëni çdo ditë, pasioni me të cilën punoni dhe mësoni, dashuria me të cilën mësoni, respekti juaj për botën që ju rrethon, për familjen, për mjedisin, për mësuesin si një institucion që duhet të vazhdojë të respektohet, për shkollën, për të cilën me aq dashuri unë dhe gjenerali flasim, sepse kemi kaluar vitet më të bukura të jetës sonë, pavarësisht se ku kemi mbërritur. Nuk do të mund ta harroja kurrë, gjimnazin ku jam formuar, universitetin ku jam formuar, madje dhe filloren ku jam formuar.
Le të vijmë tek diskutimi ynë; pse Forcat e Armatosura? Kam vetëm një përgjigje: sepse janë maja e shoqërisë. Patjetër që për të arritur te maja ka mund, ka disiplinë, ka dhe zhgënjime, por në fund të fundit, ajo, maja, është një shans i madh për gjithsecilin prej jush që do të vazhdoni apo jo universitetin, sepse hyhet 18, por mund të hyhet edhe pas universitetit. Për të pasur një shkollim falas, brenda e jashtë vendit, për të pasur një shërbim shëndetësor falas, për ju dhe familjet që do të krijoni nesër, për të pasur një mjedis të disiplinës, por një mjedis të strukturuar, dashamirës dhe që ka respekt për veten. Është një shans shumë i madh për të pasur një vend të sigurtë pune, shumë e rëndësishme në jetë, por i sigurtë jo për të ndenjur te qoshja, i sigurtë për të dhënë më të mirën, i sigurtë për të treguar që sfida nuk është asgjë për ju. Është një shans shumë i madh për të qenë pjesë e një strukture, e cila bën një gjë për veten, por bën një edhe për komunitetin. Madje, bën për komunitetin, pa bën dhe për veten. Ne duhet të jemi zemra e shoqërisë shqiptare në të gjitha drejtimet. Përpara jush ka horizonte të jashtëzakonshme, nuk ka kufij, nuk ka limite dhe një shans shumë i madh është të ardhurit pranë kësaj strukture, që është nderi i Shqipërisë. Vetëm Forcat e Armatosura kanë mbërritur të jenë në front të parë, të barabartë midis të barabartëve në misione, kanë arritur ta kenë kaq të lartë moralin, saqë dhe kur dikush mundohet t’ia prishë atë, rezulton që në fund të ditës e drejta është në anën e FA, pa u keqpërdorur, pa mundur të abuzohet me to, megjithëse politika shpeshherë ka tentuar ta bëjë këtë gjë, por nuk ia ka arritur dot dhe nuk do t’ia arrijë, sepse vet strukturimi, vetë misioni kushtetues, fisnik që kanë, vetëpërgatitja e çdo anëtari të FA në Republikën e Shqipërisë, do ta mbajë larg të keqen, sot dhe gjithmonë. Për këtë duhet punë, punë drejtuesish, punë e gjithsekujt që është pjesë. Asgjë nuk mbërrihet pa mund.
Vijmë tek një diskutim tjetër, padyshim unë po marr shkas nga diskutimi shumë i mirë dhe brilant i gjeneral Bazos, i cili ka qenë një lektor i mirë në të shkuarën e tij. Shqipëria është një vend i vogël, me histori të lashtë, të madhe, gjithsesi prapë i vogël në dimensione, sado relative të jetë kjo fjalë, por nuk besoj që akoma në shkollë mësueset ju mësojnë se kush është Arkimedi. Arkimedi vjen nga Greqia e Lashtë dhe sigurisht njihet për teoritë e tij shkencore, por mbi të gjitha ka një teori mbi teoritë që e ka thënë nëpërmjet një shprehjeje: “Më jepni një pikë ku të mbështetem dhe do të ngre gjithë botën. Ka një llogari modeste fizike për këtë gjë. Shqipëria ka një pikë ku, botën, mund ta ngrenë fuqitë e mëdha duke u mbështetur tek një vend si i yni. E dini pse? Sepse Shqipëria ka një pozicion gjeografik interesant, ku ajo pika mund të vendoset, sepse Shqipëria është në frontin e parë në luftën kundër terrorizmit, pra është një pikë shumë e rëndësishme, sepse Shqipëria është në vijën e parë të të gjitha misioneve që një organizatë politiko - ushtarake si ajo e NATO zhvillon, vepron, ekziston, që është siguria. Shumë herë sigurinë gjithsekush prej nesh e merr “for granted”. Pra, ju nuk e ndjeni sepse e keni përditë, keni lindur te një ambient që ka siguri dhe, flas për sigurinë e kufijve, të moscënimit të tyre apo jo. Siguria juaj personale, e jetës tuaj që është gjëja më e shtrenjtë për prindërit tuaj dhe siguria e të ardhmes që është gjëja më e shtrenjtë për ju, garantohen duke filluar nga përmbushja e misionit të FARSH. Ndaj, unë kërkoj prej jush një duartrokitje për djemtë dhe vajzat në uniformë që natën dhe ditën sigurojnë për ju, moshatarët tuaj, për të gjithë shqiptarët, sigurinë.
Thënë kjo, besoj që kemi mundur sadopak ta bëjmë tërheqës mendimin se shumëkush prej jush mund të jetë pjesë e FA. Ne sot, kemi 14.4% gra dhe vajza në FA. Për shumëkënd këtu, ushtarakë me yje, me grada është ok. Ne jemi në listën e pjesëmarrjes së grave në FA, pothuajse në pesëshen e parë, duke pasur parasysh vendet NATO. Unë them jo, shumë pak, madje njëherë me shaka kam thënë, nuk do të ndalem, nuk do iki nga drejtimi i Ministrisë së Mbrojtjes pa bërë një grua gjenerale. Këta kanë thënë ‘mos, i bie që do rrish shumë gjatë!’. Nuk e di, gradimi vetë, është një proces i rëndësishëm. Kapiten Tollja me gjithë shkëlqimin e tij si ushtarak, ndër më të mirët, ka studiuar në një ndër akademitë më të mira në botë, në Modena të Italisë, nuk mund të bëhet nesër gjeneral, se duhet të rrjedhë pak ujë, por vajza, ne mund t’ia dalim. Unë kam tashmë mbi një dekadë që merrem me politikë. Ka ardhur logjikshëm karriera në këtë fushë, por nuk e kam menduar kurrë që do të drejtoj Ministrinë e Mbrojtjes së një vendi t’ju them të drejtën, por ja që ja ku jam. Është hera e parë në historinë e një vendi që ndodh. Janë shumë pak gratë ministre të Mbrojtjes, të jem e sinqertë me ju. Nëpër botë dhe, janë po pak, relativisht pak, në NATO. Sot janë pesë ministre të Mbrojtjes gra të vendeve të NATO, në 28 vende. Është hera e parë në histori që kjo ndodh. Shekulli XXI është shekulli i vajzave, i grave, i motrave dhe i nënave. Ka dy çuna aty që lëvizin kokën. Unë kam qenë mësuese dhe i kuptoj grimasat e studentëve. Demek që edhe ju pëlqen edhe s’ju pëlqen ky diskutim. Do ta bëjmë bashkë, pa dyshim djem, por të paktën duhet t’ia japim këtë shans vajzave tona.
Unë vij në fakt nga një takim që pata me një vajzë, e cila ka mbaruar një ndër akademitë më të forta, në kuptimin e fortë të fjalës, në Britaninë e Madhe. Po ju them vetëm një detaj; një pjesëz të vogël së stërvitjes të kësaj vajze. Midis të gjithë atyre që merrnin pjesë atje, vetëm kjo ishte shqiptare. I kanë marrë, i kanë hipur në një avion luftarak dhe i kanë parashutuar në një vend X të Evropës, pa ditur se ku parashutohet. Kjo është një vajzë shqiptare që ka mbaruar suksesshëm këtë akademi, vajzë gjë që ju e keni parë vetëm nëpër filma apo nëpër ato lojëra që bëni.
Pra, mund t’ia dalim, sepse shtysa është shumë e fortë. Është sa dinjitare, fisnike aq edhe pragmatiste. Kështu që, duke mos dashur të bie as në përsëritje dhe as të kalojmë në mërzi, unë jam e bindur që mbas këtij takimi, ju jo vetëm do të reflektoni, por do shkoni ta tregoni dhe në shtëpi këtë gjë. Do ketë ndonjë mama që do të thotë obobo vajza ime ushtare, oficere. Jo! Shanset janë të mëdha, mundësitë janë të mëdha për ta bërë karrierën tuaj këtu brenda dhe shpresoj shumë që bashkërisht ne kemi zgjuar ato qoshet e fjetura të pasionit tuaj, të mendjes tuaj të ndritur, të vullnetit tuaj, të dashamirësisë tuaj për të zbuluar gjëra të reja dhe, në këtë mënyrë të mund ta konsideroni këtë ftesë që del nga mendja dhe zemra e kujt drejton sot Ministrinë e Mbrojtjes dhe FA të Shqipërisë.
Jeni më shumë se të mirëpritur të merrni pjesë në proceset e rekrutimit, ku nuk ka më emra që dalin nga fundi i listës për të qenë të parët, ku nuk ka më fitues që nuk e kanë bërë atë vrapin 400m në një pistë, ku nuk ka më anonimë që këtu vijnë për të marrë një rrogë. Ajo epokë ka mbaruar. Sot, ka ftesë për të frymëzuar ju dhe gjithë brezin që ju përfaqësoni për të qenë pjesë e ajkës së shoqërisë shqiptare, të FA.
Ju falënderoj shumë që keni ardhur, ju uroj shumë suksese, vazhdoni të jeni këta që jeni, mësoni, bëni qejf, dashuroni, por mos harroni një gjë, respektin për veten mos e ulni askurrkund. Duke pasur respekt për veten, do të keni respekt për familjet tuaja, për shkollën, mjedisin ku jetoni dhe duhet të bëheni qendra komunitare për një shoqëri që akoma ka nevojë për mësimin pozitiv që Shqipëria dhe shqiptarët bëhen.
Ne do të bëhemi, ne jemi, ju jeni pjesa më e mirë e saj dhe ndaj nuk shikoj asnjë arsye pse kjo gjë nuk duhet të ndodhë.
Ju faleminderit dhe njëherë e suksese!
