Në Bazën Ajrore në Farkë u zhvillua ceremonia festive me rastin e 63-vjetorit të krijimit të Aviacionit Luftarak Shqiptar (sot Forca Ajrore). Në këtë aktivitet ishin të pranishëm: zëvendësministri i Mbrojtjes, z. Dritan Hila, shefi i Shtabit të Përgjithshëm të FA, gjeneralmajor Jeronim Bazo, komandantët e Forcave, atashe ushtarak të akredituar në vendin tonë, drejtorë drejtorish në MM dhe SHPFA, veteranë të aviacionit, familjarë të dëshmorëve të Aviacionit, ushtarakë të Forcës Ajrore, si dhe të ftuar të tjerë.
Fjalën e hapjes e mbajti komandanti i Forcës Ajrore, gjeneral brigade Frederik Beltoja. Shefi i Shtabit të Përgjithshëm të FA, gjeneralmajor Jeronim Bazo, në fjalën e tij theksoi se, në rrugën e krijimit të FA shqiptare një vend të rëndësishëm ka zënë edhe Arma e Aviacionit shqiptar.
Përpjekjet e sakrificat e qindra ushtarakëve të kësaj arme për realizimin e detyrave të kryera prej saj, kanë hedhur themele të sigurta për ecjen e mëtejshme, për ruajtjen e traditave më të mira, për të çuar edhe më tej arritjet e paraardhësve dhe për të realizuar atë transformim e modernizim të kësaj arme në parametrat e kërkuara nga anëtarësimi në NATO. Modernizimi i Forcës Ajrore me teknologji perëndimore, si dhe trajnimi i teknikëve dhe pilotëve në këto shkolla, ka vijuar më tej ai, kanë bërë që imazhi dhe vizioni i kësaj force të ndryshojë. Blerja e helikopterëve COUGAR, 3 prej të cilëve tashmë janë pjesë e kësaj force, e bën efektivin fluturues të Forcës Ajrore të operojë me të njëjtat standarde dhe manuale si forcat e tjera ajrore anëtare të NATO. Gjeneralmajor Bazo ka vlerësuar kontributin e çmuar që kanë dhënë edhe veteranët Aviacionit, të cilët me punën e tyre të vyer kanë hedhur themele të sigurta për konsolidimin dhe modernizimin e Forcës Ajrore shqiptare. “Një respekt dhe mirënjohje e veçantë shkon për Dëshmorët e Aviacionit, të cilët me përkushtimin dhe vetëmohimin e tyre, janë burim frymëzimi për mënyrën se si i duhet shërbyer atdheut”, është shprehur shefi i Shtabit të Përgjithshëm, gjeneralmajor Jeronim Bazo.
Në mbyllje të këtij aktiviteti zëvendësministri Hila, gjeneralmajor Bazo dhe të pranishmit e tjerë ndoqën një demonstrim ajror të përgatitur nga pilotët e Bazës Ajrore Farkë, me pjesëmarrjen e helikopterëve EC-145, COUGAR, AB-205 dhe BO-105.
Aviacioni Luftarak Shqiptar është krijuar me 24 prill të vitit 1951 dhe është rritur e fuqizuar ndër vite në përshtatje me misionin dhe detyrat e caktuara. Në këto 63 vite në armën e Aviacionit kanë shërbyer me dhjetëra e qindra pilotë, teknikë dhe ushtarakë të zotë e të talentuar, të cilët i dhanë emër dhe krenari kësaj arme në të gjithë vendin, ndërsa 36 prej tyre kanë rënë në krye të detyrës dhe sot janë Dëshmorë të Atdheut dhe prehen në Varrezat e Dëshmorëve. Me ndryshimet e ndodhura në Forcat e Armatosura, u shtrua si nevojë e kohës modernizimi dhe zëvendësimi i teknikës lindore me atë perëndimore. Tashmë rëndësi i është kushtuar fuqizimit të Forcës Ajrore me helikopterë, kryesisht të funksioneve të kërkim-shpëtimit SAR, të transportimit të të plagosurve dhe transportimit të trupave. Forca Ajrore jep kontribut në operacione humanitare në ndihmë të njerëzve në nevojë, për transport të të sëmurëve, në ndihmë të komunitetit gjatë përmbytjeve, izolimit nga dëbora etj.
Forcat Ajrore po synojnë rritjen e kapaciteteve operacionale për të qenë e aftë për zhvillimin e operacioneve luftarake e joluftarake dhe të ndërveprueshme me ushtritë aleate të NATO. Në vitin 2001 erdhën helikopterët e parë AB-206, më pas AB-205, BO-105, EC-145 dhe këto vitet e fundit FA edhe 3 helikopterë shumëfunksional COUGAR, ndërsa personeli është certifikuar në akademitë perëndimore.
