Direktiva e Mbrojtjes 2024

Rendi global aktualisht është duke u përballur me forcën ushtarake për zgjerim territoresh, si dhe me ndryshime gjeopolitike dhe kërcënime të shtuara të sigurisë, të cilat tashmë shfaqen si në natyrën konvencionale, por edhe në forma hibride duke përfshirë hapësirën kibernetike, atë informative por edhe në sferën ekonomike, sociale dhe politike. Interesat strategjike të Shqipërisë janë të lidhura ngushtësisht me përmbushjen e detyrimeve si vend anëtar i NATO-s dhe vend kandidat i Bashkimit Evropian, si dhe me mbrojtjen dhe sigurinë e territorit të përcaktuar në Kushtetutën e RSH-së dhe Traktatin e Atlantikut të Veriut.

Sulmet e fundit terroriste dhe aktet e përsëritura destabilizuese në veri të Kosovës, tensionet e shtuara etnike në rajon, si dhe ambicia e ndikimi rus e kinez në vende të zgjedhura të Ballkanit Perëndimor e bëjnë edhe më emergjente nevojën për më tepër burime dhe investime për zhvillimin e kapaciteteve të mbrojtjes.

Gjatë vitit 2023, MM dhe strukturat e saj kanë arritur zhvillime të rëndësishme në fushën e modernizimit me rritjen e kapaciteteve të Forcave të Armatosura, përmirësimin e trajtimit financiar për personelin ushtarak dhe atë civil, gjithashtu dhe me kontributin e çmuar të Forcave të Armatosura dhe ekipit të Mbrojtjes Civile, në mbështetje të komunitetit me anë të operacioneve të ndryshme në ndihmë të popullsisë dhe në rastet e fatkeqësive natyrore.

Për vitin 2024, angazhimet dhe prioritetet kryesore të punës të MM dhe të FARSH, do të jenë të lidhura me rritjen e sigurisë kombëtare dhe euroatlantike, zhvillimin e sistemit dhe kapaciteteve të hapësirës ajrore, vijimin e prezencës në misionet e NATO-s, BE-së dhe OKB-së, si dhe kontribut i menjëhershëm në mbështetje të popullsisë civile, në rastet e mundshme të emergjencave civile.

Drejtimet kryesore që do të punohet gjatë 2024 gjenden në dokumentin:

Direktiva e Mbrojtjes 2024 në format pdf

Strategjia për Mbrojtjen Kibernetike

Shpejtësia e ndryshimit të teknologjisë të informacionit dhe komunikimit, rrit dita-ditës rrezikun e sulmeve kibernetike.

Sistemet e informacionit të MM dhe FA deri më sot nuk janë prekur nga këta sulme. Për të paraprirë dhe adresuar këtë sfidë është hartuar Strategjia e Mbrojtjes Kibernetike me qëllim forcimin e sistemeve tona të sigurisë kibernetike, zbulimin, parandalimin e tyre dhe përgjigjen e menjëhershme ndaj incidenteve të mundshme.

Që prej vitit 2014 në Ministrinë e Mbrojtjes janë hartuar dhe realizuar tri strategji për Mbrojtjen Kibernetike me synimin e një qasjeje gjithëpërfshirëse për zhvillimin e kapaciteteve ushtarake në hapësirën kibernetike.

Strategjia e re pesëvjeçare për vitet 2024 -2028 ka për vizion garantimin e hapësirës kibernetike të sigurt në të gjithë aktivitetin e MM dhe FA, nëpërmjet vendosjes në eficiencë të kapaciteteve për sigurinë kibernetike, përmirësimit dhe zhvillimit të tyre, për të konsoliduar aftësitë mbrojtëse dhe reaguese, rritjes së vetëdijes, profesionalizmit dhe fuqizimit të bashkëpunimit dhe koordinimit me institucionet kombëtare dhe ndërkombëtare.

Investimet në zhvillimin e kapaciteteve kibernetike, janë në rritje si dhe ngritja dhe funksionimi i Njësisë Ushtarake të Sigurisë Kibernetike është rezultati përpjekjeve më të fundit për përmirësim dhe modernizim të mëtejshëm.

Mbrojtja kibernetike është pjesë e detyrës kryesore të NATO, ku fokusi kryesor është mbrojtja e rrjeteve të veta (përfshirë operacionet dhe misionet) dhe rritja e qëndrueshmërisë në të gjithë Aleancën, duke forcuar vazhdimisht aftësitë e saj me edukimin, trajnimin dhe ushtrimet kibernetike.

Dokumenti është një hap i rëndësishëm drejt forcimit të Mbrojtjes Kibernetike dhe të Sigurisë Kombëtare dhe përfshin vizionin, qëllimet dhe objektivat për të adresuar rreziqet kibernetike dhe për të siguruar që sistemet tona kibernetike në MM dhe FA të jenë të përballueshme dhe të rezistueshme ndaj sfidave të kohës së sotme dhe është i strukturuar në tre pjesë:

Strategjia për Mbrojtjen Kibernetike 2024 - 2028 në format pdf

Strategjia e Menaxhimit të Burimeve Njerëzore (2020 - 2024)

SBNJ (2020-2024) e Ministrisë së Mbrojtjes përmban vizionin, parimet dhe konceptet themelore për politikat, planifikimin dhe procedurat që mbështesin ciklin jetësor të burimeve njerëzore për oficerët, nënoficerët, ushtarët dhe personelin civil në Forcat e Armatosura të Republikës së Shqipërisë, kujdesin për familjet e tyre dhe për ushtarakët në rezervë, lirim e pension.
Ajo siguron drejtimin strategjik për politikat dhe planet e burimeve njerëzore të mbrojtjes, mbështet kryerjen e misionit të mbrojtjes kombëtare, përmbushjen e detyrimeve të Ministrisë së Mbrojtjes në kuadrin e NATO, si dhe të angazhimeve në kuadër të BE dhe OKB për pesë vitet e ardhshme...

Strategjia e Menaxhimit të Burimeve Njerëzore (2020 - 2024) në format pdf

Dokumenta për Barazinë Gjinore dhe Shanset e Barabarta në FA

Përkufizuar si barazi midis burrave dhe grave në të gjitha sferat, si publike dhe private, barazi gjinore do të thotë akses dhe kontroll i barabartë mbi burimet dhe përfitimet, pjesëmarrje e barabartë në vendimmarrjen politike dhe barazi me ligj për gratë dhe burrat.
Integrimi gjinor, d.m.th. procesi që siguron që perspektiva gjinore dhe qëllimi për barazi gjinore të jenë në qendër të të gjitha aktiviteteve - zhvillim politikash, kërkime, advokim/dialog, legjislacion, shpërndarje e burimeve si dhe planifikim, zbatim dhe monitorim i programeve dhe projekteve, si një strategji për të promovuar dhe arritur barazinë gjinore, duhet të jetë pjesë e të gjitha politikave sociale, ekonomike dhe politike në Shqipëri. Një strategji e tillë jo vetëm siguron arritjen e një zhvillimi të qëndrueshëm nëpërmjet shfrytëzimit të potencialit të plotë njerëzor të vendit, por edhe garanton që të gjitha grupet shoqërore t’i gëzojnë këto arritje.