Bruksel, takimi i Kryeministrit Rama me Sekretarin e Përgjithshëm të NATO-s, Mark Rutte, ri-konfirmohet mbajtja e Samitit të ardhshëm në Tiranë

e martë, 03 nëntor 2026 19:10

Kryeministri Edi Rama zhvilloi një takim me Sekretarin e Përgjithshëm të NATO-s, Mark Rutte, në fokus të të cilit ishin sfidat aktuale të sigurisë euroatlantike, forcimi i bashkëpunimit strategjik brenda Aleancës dhe roli i Shqipërisë në përmbushjen e prioriteteve të përbashkëta të mbrojtjes.

Fotogaleria

Vëmendje e veçantë iu kushtua thellimit të bashkërendimit me NATO-n në përballimin e kërcënimeve hibride, përfshirë sulmet kibernetike, dezinformimin, ndërhyrjet e huaja dhe mbrojtjen e infrastrukturës kritike, si sfida që kërkojnë një përgjigje gjithnjë e më të koordinuar mes vendeve aleate.

Një tjetër çështje me rëndësi strategjike ishte zhvillimi i Korridorit VIII si korridor i mobilitetit ushtarak, që lidh Adriatikun me Detin e Zi dhe përbën një komponent të rëndësishëm për lëvizshmërinë, gatishmërinë operacionale dhe sigurinë e krahut juglindor të NATO-s. Në këtë kuadër u trajtua edhe rëndësia e projektit të Porto Romanos për zhvillimin e kapaciteteve infrastrukturore dhe logjistike në mbështetje të nevojave strategjike të Aleancës.

Gjatë takimit u ri-konfirmua gjithashtu mbajtja në Tiranë e Samitit të radhës të NATO-s, në vijim të vendimit të marrë nga vendet aleate. Organizimi i këtij samiti përbën një moment me rëndësi të veçantë për Shqipërinë, jo vetëm si vend mikpritës i forumit më të lartë politik të Aleancës, por edhe si një aleat me rol dhe përgjegjësi në rritje në arkitekturën euroatlantike të sigurisë.

Në një mjedis ndërkombëtar të karakterizuar nga pasiguri të shtuara dhe sfida të ndërlikuara gjeopolitike, Samiti i radhës i NATO-s në Tiranë do të vendosë Shqipërinë dhe Ballkanin Perëndimor në qendër të diskutimeve strategjike për të ardhmen e sigurisë kolektive, duke konfirmuar rëndësinë e rajonit për stabilitetin dhe sigurinë euroatlantike.

I pranishëm në këtë takim në Selinë e NATO-s në Bruksel ishte edhe Ministri i Mbrojtjes i Republikës së Shqipërisë, z. Ermal Nufi.

Përmes një publikimi në rrjetet e tij sociale, Ministri Nufi u shpreh se:

“Vlerësimet dhe inkurajimi për ecurinë e sektorit të mbrojtjes në Shqipëri janë motivim për të vijuar me vendosmëri rrugën e modernizimit dhe forcimit të kapaciteteve tona në mbrojtje e siguri.”

Ai shtoi gjithashtu se “Shqipëria mbetet një aleate serioze dhe e përkushtuar, e vendosur për të përmbushur detyrimet e saj në NATO dhe për të dhënë një kontribut gjithnjë e më të rëndësishëm në sigurinë kolektive dhe mbrojtjen e vlerave të Aleancës.”