Tiranë, forcim i bashkëpunimit rajonal në fushën e kërkim-shpëtimit aeronautik

Zëvendësministrja e Mbrojtjes, Blerina Abrazhda, mori pjesë në takimin e dytë të Komitetit Këshillues Rajonal të Kërkim-Shpëtimit Aeronautik (RASARAC) për vitin 2026, organizuar nga Qendra Kombëtare e Kërkim-Shpëtimit (QKKSH).

Fotogaleria

Takimi u fokusua në forcimin e bashkëpunimit rajonal, koordinimin e operacioneve të kërkim-shpëtimit, vlerësimin e kapaciteteve dhe aseteve SAR të vendeve anëtare, si dhe lehtësimin e procedurave për operacionet ndërkufitare.

Gjatë fjalës së saj, Zëvendësministrja Abrazhda theksoi angazhimin e Shqipërisë për ndërtimin e një sistemi kërkim-shpëtimi më të fuqishëm, me kapacitete më të larta dhe reagim më efikas, duke nënvizuar se kjo është jo vetëm një përparësi kombëtare, por edhe një përgjegjësi e përbashkët rajonale dhe ndërkombëtare.

Në kuadër të aktivitetit u zhvilluan edhe mbledhja e 28-të e Grupit të Ekspertëve dhe mbledhja e 29-të e Bordit Drejtues të vendeve anëtare të RASARAC.

Ky aktivitet i paraprin stërvitjes ndërinstitucionale të kërkim-shpëtimit aeronautik SAREX-2026, e cila synon testimin e gatishmërisë operacionale dhe forcimin e koordinimit ndërinstitucional në përballimin e situatave emergjente.