Zëvendësministrja e Mbrojtjes Skana: “Tetori Rozë është më shumë se 31 ditë”

e hënë, 02 nëntor 2026 15:18

Në kuadër të përmbylljes së fushatës ndërkombëtare të ndërgjegjësimit për luftën kundër kancerit të gjirit, zëvendësministrja e Mbrojtjes, znj. Pranvera Skana, priti në Garnizonin “Skënderbej” ministren e Shëndetësisë dhe Mirëqenies Sociale, znj. Klodiana Spahiu, dhe drejtoreshën e Institutit të Shëndetit Publik, znj. Dorina Toçi.

Fotogaleria

Me këtë rast, u zhvillua një takim sensibilizues me vajzat dhe gratë e Forcave të Armatosura, ku në fokus ishte rëndësia e parandalimit, diagnostikimit të hershëm dhe kryerjes së kontrolleve periodike për shëndetin e gjirit.

Nën kujdesin e veçantë të zëvendësministres së Mbrojtjes Skana, në ambientet e Garnizonit “Skënderbej” u stacionua në dispozicion të grave ushtarake dhe civile mamografia e lëvizshme, duke sjellë shërbimin më pranë grave të Forcave të Armatosura.

Gjatë fjalës së saj, zëvendësministrja Skana vlerësoi angazhimin dhe pjesëmarrjen e vajzave dhe grave të Forcave të Armatosura në aktivitetet sensibilizuese, duke theksuar se ndërgjegjësimi dhe kujdesi për shëndetin e gruas nuk duhet të kufizohen vetëm në muajin tetor, por të jenë pjesë e vëmendjes çdo ditë të vitit.

Sakaq, ministrja e Shëndetësisë dhe Mirëqenies Sociale, znj. Klodiana Spahiu, bëri thirrje për forcimin e bashkëpunimit ndërinstitucional dhe për një angazhim të përbashkët në nxitjen e grave për të mos i shtyrë kontrollet shëndetësore.

Sipas të dhënave të Ministrisë së Shëndetësisë dhe Mirëqenies Sociale, gjatë periudhës janar–tetor 2026, në të gjithë vendin janë kryer 13,948 ekzaminime mamografike, nga të cilat 5,275 vetëm gjatë muajit tetor.