Konferenca Kombëtare për Sigurinë Kibernetike/ Zëvendësministrja Skana: “Krijimi i mundësive për talentet e reja, thelbësore për t'iu përgjigjur sfidave”

e martë, 03 nëntor 2026 17:06

Zëvendësministrja e Mbrojtjes, znj. Pranvera Skana mori pjesë në Konferencën Kombëtare për Sigurinë Kibernetike, organizuar nga Autoriteti Kombëtar për Sigurinë Kibernetike (AKSK), me temë “Rritja e Rezistencës Kibernetike: Forcimi i Linjës së Parë të Mbrojtjes”.

Fotogaleria

Znj. Skana diskutoi në panelin, me temë “Më shumë rregulla, më shumë përgjegjësi, më pak ekspertë: Si ta kapërcejmë hendekun e kapaciteteve në sigurinë kibernetike?” ku ndau perspektivën e mbi rëndësinë që Forcat e Armatosura Shqiptare (FARSH) i kushtojnë përfshirjes së të rinjve, profesionistëve të IT-së dhe studentëve në fushën e sigurisë kibernetike, ku krijimi i mundësive për talentet e reja janë thelbësore për t'iu përgjigjur sfidave të reja të sigurisë.

Zëvendësministrja e Mbrojtjes znj. Skana u shpreh gjatë fjalës së saj se në një botë gjithnjë e më digjitale, mbrojtja e hapësirës kibernetike është po aq e rëndësishme sa mbrojtja e integritetit territorial të vendit.

Konferenca Kombëtare për Sigurinë Kibernetike, bëri bashkë përfaqësues të institucioneve, operatorëve të infrastrukturave kritike, sektorit privat dhe partnerëve ndërkombëtarë.

Në fokus të diskutimeve ishin forcimi i rezistencës kibernetike, përgatitja dhe reagimi ndaj incidenteve, ruajtja e shërbimeve jetike dhe mungesa e specialistëve të kualifikuar.

Qëllimi i konferencës ishte nxitja e bashkëpunimit dhe forcimi i kapaciteteve për të përballuar kërcënimet kibernetike, duke garantuar një mbrojtje më të qëndrueshme të hapësirës digjitale.