Ervis Tema

Drejtor i Kabinetit të Ministrit të Mbrojtjes

Ervis Tema është drejtor i Kabinetit të Ministrit të Mbrojtjes që prej marsit të vitit 2026.

Ervis Tema është Drejtor i Kabinetit të Ministrit të Mbrojtjes të Republikës së Shqipërisë. Në këtë detyrë ai koordinon funksionimin e kabinetit të ministrit, mbështet proceset strategjike të vendimmarrjes dhe kontribuon në koordinimin institucional ndërmjet strukturave të Ministrisë së Mbrojtjes, Forcave të Armatosura dhe partnerëve kombëtarë e ndërkombëtarë në fushën e sigurisë dhe mbrojtjes.

Para emërimit në këtë detyrë, z. Tema ka mbajtur pozicione drejtuese dhe koordinuese në sektorin e mbrojtjes dhe sigurisë. Së fundmi ai ka ushtruar detyrën e Drejtorit të Licencimit dhe Koordinatorit të Sigurisë në Agjencinë e Industrisë së Mbrojtjes, ku ka kontribuar në zhvillimin e mekanizmave të sigurisë institucionale dhe në mbështetjen e proceseve të licencimit dhe kontrollit në sektorin e industrisë së mbrojtjes.

Gjatë karrierës së tij ushtarake ai ka mbajtur një sërë funksionesh në strukturat e Forcave të Armatosura të Republikës së Shqipërisë, përfshirë detyrën e ndihmësit ushtarak të Komandantit të Komandës Mbështetëse dhe ndihmësit ushtarak të Shefit të Shtabit të Përgjithshëm të Forcave të Armatosura. Ai ka shërbyer gjithashtu si komandant toge dhe zëvendëskomandant kompanie.

Në kuadër të angazhimeve ndërkombëtare, ai ka marrë pjesë në misione dhe struktura shumëkombëshe të NATO-s, përfshirë shërbimin në KFOR në Kosovë, në misionin e NATO-s në Herat, Afganistan, si dhe si Koordinator i Sigurisë i një baze të NATO-s në Letoni.

Z. Tema është diplomuar në Akademinë Ushtarake të Shqipërisë në fushën e transportit dhe logjistikës dhe ka përfunduar studimet Master në Administrim Biznesi (MBA) pranë Fakultetit të Ekonomisë të Universitetit të Tiranës. Ai ka ndjekur gjithashtu trajnim profesional në Army Logistics University në Shtetet e Bashkuara të Amerikës.

Ai zotëron gjuhën angleze.

Z. Ervis Tema është i martuar dhe ka një fëmijë.