Ministrja Kodheli takim me homologun turk, Vecdi Gönül

e hënë, 26 tetor 2015 12:16

Foto Galeri

Ministrja e Mbrojtjes, znj. Mimi Kodheli, gjatë punimeve të Ministerialit të Mbrojtjes së vendeve të Europës Juglindore që u mbajt në Kroaci, zhvilloi një takim me ministrin e Mbrojtjes së Republikës së Turqisë, z. Vecdi Gönül.

Gjatë këtij takimi ministrja Kodheli i shprehu ngushëllimet më të sinqerta homologut të saj turk për sulmet vetëvrasëse të ndodhura në Ankara dhe shtoi se në këto ditë i qëndrojmë pranë popullit turk. Në këtë kontekst, ministrja e Mbrojtjes Kodheli u shpreh se “Shqipëria është thellësisht e shqetësuar për dhunimin e hapësirës ajrore të Turqisë nga avionët rusë. Shqipëria qëndron në mbështetje të fortë të Republikës së Turqisë. Veprimet e Rusisë nuk kontribuojnë në sigurinë dhe stabilitetin në rajon. Rusia duhet të respektojë plotësisht hapësirën ajrore të NATO”. Ministrja shqiptare e Mbrojtjes përshëndeti Turqinë për qindra e mijëra refugjatë sirianë që po mban dhe përpjekjet e jashtëzakonshme të saj në këtë drejtim.

Po kështu, znj. Kodheli e falenderoi homologun e saj turk për kontributin e madh që Turqia dhe Forcat e saj të Armatosura kanë dhënë dhe japin për edukimin dhe trajnimin e ushtarakëve shqiptarë. Ajo vlerësoi gjithashtu edhe pjesëmarrjet e përbashkëta të dy vendeve tona në misionet paqeruajtëse.
Nga ana e tij, ministri turk i Mbrojtjes, Vecdi Gönül, theksoi se Shqipëria është vend i rëndësishëm për Turqinë ndaj dhe duhet thelluar bashkëpunimi mes dy vendeve tona.