Merr zyrtarisht detyrën komandanti i ri i Forcës Ajrore gjeneral brigade Ferdinant Dimo

e enjte, 21 shtator 2023 09:08

Fotogaleria

Nga sot, Forca Ajrore do të drejtohet nga komandanti i ri, gjeneral brigade Ferdinant Dimo. Në ceremoninë e kalimit të detyrës ishte i pranishëm edhe ministri i Mbrojtjes Niko Peleshi, shefi i Shtabit të Përgjithshëm të FA gjeneralmajor Arben Kingji, ish-komandanti i Forcës Ajrore gjeneral brigade Ylli Pulaj e komandantë të forcave të ndryshme.

Teksa i uroi punë të mbarë në ushtrimin e detyrës së re, gjeneral brigade Ferdinant Dimos, ministri i Mbrojtjes Niko Peleshi shpalosi edhe objektivat që e presin përpara Forcën Ajrore, të cilën e konsideroi një nga strukturat më të rëndësishme të Forcave të Armatosura, e cila është në të mbështetje të përhershme të komuniteteve dhe autoriteteve lokale e qendrore të vendit.

“Baza e parë Ajrore Taktike e NATO po ndërtohet në Shqipëri, pikërisht në Kuçovë dhe kjo kërkon padyshim përgjigjen nga ana jonë, me rritje kapacitetesh, rritjen e teknologjisë së integruar dhe aftësive për ta menaxhuar. Jemi në përmbyllje të investimit, mbi 90 % e të cilit ka përfunduar dhe së shpejti ne presim të bëjmë inaugurimin e të parës bazë taktike”, - u shpreh z. Peleshi.

Ministri i Mbrojtjes foli edhe për një tjetër objektiv, ndërtimin e flotës së helikopterëve “Black Hawk”.

“Për të arritur në këtë ditë na është dashur të ecim në një proces jo të lehtë, në krah të partnerëve tanë strategjikë, në një projekt, i cili është menaxhuar dhe ka ardhur tek ne si paketë e plotë që përmban edhe ngritjen e kapaciteteve, trajnimin e helikopterëve, stafit mbështetës, teknikëve të mirëmbajtjes. Pra, është bërë një punë e madhe dhe dua ta falënderoj gjeneral Pulajn dhe të gjithë ata ushtarakë e civilë, që kanë qenë në krah të tij për të arritur deri këtu. Edhe procesi inovativ dhe risia e ndërtimit të flotës së parë të mjeteve luftarake pa pilot, pra dronëve, është tani në zbatim e sipër. Shpresoj në tremujorin e parë të vitit që vjen ne ta bëjmë atë realitet”, - sqaroi ministri Peleshi.

Sipas tij, pranë Bazës së Kuçovës do të ndërtohet edhe qendra e operimit dhe menaxhimit të kësaj flote të re që ka përdorim jo vetëm ushtarak, jo vetëm në kohë lufte por edhe në kohë paqe, edhe në përdorim civil.

Ministri i Mbrojtjes vlerësoi punën shumë të mirë të Forcës Ajrore gjatë sezonit të zjarreve. “Ky vit është nga më të suksesshmit në menaxhimin e zjarreve. Ka patur mbi 500 vatra zjarri, por po të pyesim qytetarët nuk e kanë perceptuar si shqetësim. Nuk është vetëm çështje fati, por edhe çështje menaxhimi, së pari nga strukturat vendore, por Forca Ajrore ka qenë aty. Nuk ka patur asnjë ankesë publike dhe jopublike për gatishmërinë e helikopterit për mbështetje në vatra zjarri”, - theksoi Ministri Peleshi. Por, shtoi ai, “sfidat janë shumë më të mëdha përpara. Çështja e mirëmbajtjes së helikopterëve është një prej tyre. Duhet të jemi gati për çdo situatë, jo vetëm në kohë paqeje, pasi e kemi të garantuar sigurinë, por për çdo situatë tjetër të cenimit të sigurisë. Deri dje dukej si përrallë nga e kaluara, por lufta në Ukrainë ka treguar që konfliktet sidomos në Ballkanin Perëndimor, një rajon me konflikte të fjetura mund të aktivizohen për shkak të prishjes së ekuilibrave gjeopolitikë që solli lufta në Ukrainë”.

Një projekt tejet i rëndësishëm është edhe ai i Sistemit shqiptar të Mbrojtjes Ajrore. “Ne kemi patur disa sulme kibernetike, të cilat u menaxhuan me sukses, që do të thotë se nuk u arrit nga ana e agresorëve ajo që synonin, fshirja e të dhënave. Por ishte një sulm shumë serioz që na bëri ta vendosim sigurinë kibernetike në rreshtat e para të prioriteteve tona. Dhe po kështu është edhe Mbrojtja Ajrore. Ne po punojmë me Shtabin e Përgjithshëm, për Sistemin shqiptar të Mbrojtjes Ajrore, të cilin tashmë e kemi dizajnuar, kemi projektet, buxhetet e nevojshme. Po diskutojmë edhe me Ministrinë e Financave se si do ta mbulojmë në një periudhë afatmesme këtë shpenzimet për këtë sistem që është i kushtueshëm, por i domosdoshëm në këtë situatë që po jetojmë”, - u shpreh z. Peleshi, i cili i kërkoi komandantit të ri ta kenë në qendër të vëmendjes.

Në fjalën e tij, komandanti i ri i Forcës Ajrore, gjeneral brigade Ferdinant Dimo falënderoi ministrin Peleshi dhe presidentin Begaj për besimin e dhënë, ndërsa tha se “Krijimi i Batalionit të Mbrojtjes Ajrore dhe i Detashmentit të Dronëve, pasurimi i fuqisë ajrore me kapacitetet e reja të helikopterëve ‘Black Hawk’, përfundimi i implementimit të sistemeve të SIVHA dhe GAG, i projekteve të ASBE dhe NATINADS do të jenë kryefjala e punës dhe veprimtarisë së përditshme të Forcës Ajrore”.

Nga ana e tij edhe ish-komandanti i Forcës Ajrore gjeneral brigade Ylli Pulaj përmendi reformat e kryera deri më tani, duke prekur në veçanti realizimin e mirëmbajtjes së mjeteve ajrore nëpërmjet Agjencisë së Prokurimeve dhe Mbështetjes së NATO, e cila, sipas tij, ka bërë që shumë prej problematikave të merrnin rrugën e zgjidhjes.