Inaugurohet Baza Ajrore Taktike e NATO në Kuçovë, Peleshi: Investim madhor, aset për të gjithë rajonin

e hënë, 04 mars 2024 14:08

Fotogaleria

U inaugurua sot Baza Ajrore Taktike e NATO-s në Kuçovë. Në ceremoninë e zhvilluar me këtë rast morën pjesë drejtuesit më të lartë të shtetit: presidenti Bajram Begaj, kryeministri Edi Rama, kryetarja e Kuvendit Lindita Nikolla, ministri i Mbrojtjes Niko Peleshi, shefi i SHP të FARSH gjeneralmajor Arben Kingji, përfaqësues të lartë të NATO, ministra të vendeve anëtare të Aleancës, ministri i Mbrojtjes së Kosovës Ejup Maqedonci, ambasadorë, ushtarakë dhe ish-ushtarakë.

Në fjalën e tij me këtë rast, ministri i Mbrojtjes Niko Peleshi, tha se Baza e Kuçovës është një prej investimeve më madhore të NATO në Shqipëri, që do të shërbejë si bazë ajrore taktike dhe operacionale. Z. Peleshi theksoi se baza ka kapacitetin e nevojshëm edhe për të mbështetur përpjekjet e përbashkëta në rajon për fatkeqësitë natyrore: “Pozicioni gjeografik i favorshëm mund t'a kthejë këtë vend në një nyje lidhëse të vlefshme për të gjithë vendet e rajonit tonë. Në këtë kontekst ndihma dhe mbështetja që Shqipëria mund të japë për vendet fqinje na bën të ndihemi më të vlefshëm se kurrë më parë, por edhe më të përkushtuar se kurrë më parë për të qenë në lartësinë e duhur përballë çdo situate”, - tha ministri Peleshi.

Ndër të tjera ministri i Mbrojtjes kërkoi mbështetjen e vendeve aleate në përpjekjet e Shqipërisë për t’a vendosur në përdorim të NATO edhe përdorimin ushtarak të Porto Romanos: “Në këtë logjikë baza që inaugurojmë sot është një aset për të gjithë rajonin. Shqipëria do të vijojë përpjekjet e saj për të vendosur në përdorim të NATO edhe përdorimin ushtarak të Porto Romanos, që sëbashku me korridorin strategjik VIII i siguron Aleancës sonë aksin më të shkurtër të kalimit nga brigjet e Adriatikut në Detin e Zi. Shpresoj të kemi mbështetjen e vendeve aleate dhe mike në këtë projekt madhor”, - tha ministri i Mbrojtjes.

Presidenti Bajram Begaj u shpreh se rijetësimi i kësaj baze shënon një kapitull të ri në historinë e mbrojtjes dhe sigurisë së vendit tonë e të gjithë rajonit: “Ne sëbashku dërgojmë mesazhin e fuqishëm të paqes dhe dëshmojmë se NATO është e vendosur të mbrojë lirinë dhe sigurinë e aleatëve, duke garantuar mbrojtje kolektive”, - u shpreh komandanti i Përgjithshëm i FA.

Kryeministri Edi Rama deklaroi se Baza e re Ajrore e NATO në Kuçovë i jep vendit tonë një rëndësi të re gjeostrategjike. Kryeministri shprehu vlerësim për të gjithë ata që kontribuan në hapjen e bazës: "Dua t’i shpreh një falënderim të posaçëm të gjithë atyre që kontribuuan duke filluar, sigurisht nga aleatët tanë të NATO-s me shpresën dhe besimin që kjo Bazë e re Taktike Ajrore e NATO-s do të shoqërohet në vitet në vijim nga Baza e re Detare e NATO në Porto Romano, gjë për të cilën po punojmë ngushtësisht me NATO-n dhe jemi shumë besimplotë se së shpejti do të mund t’i gëzohemi lajmit të përfshirjes së këtij projekti në planet e Aleancës. Riaktivizimi i këtij aeroporti ushtarak është njëkohësisht edhe pjesë e ripërtëritjes dhe rritjes së mëtejshme cilësore të Flotës sonë Ajrore. Një bazë, e cila sot është tërësisht e transformuar dhe e gatshme si një Bazë e re Taktike e NATO-s me një rëndësi që i tejkalon kufijtë e Shqipërisë. Një bazë, e cila është një tjetër element sigurie për rajonin tonë të Ballkanit Perëndimor", - u shpreh z. Rama.

Kryetarja e Kuvendit Lindita Nikolla e cilësoi si një moment krenarie hapjen e kësaj baze, pasi: “SHBA e NATO kanë krijuar bindjen se nëse ka një vend anëtar të ri të Aleancës që mbështet qartësisht, vendosmërisht dhe pa asnjë dilemë vendimet e saj, ky vend është Shqipëria”.

Komandanti i NATO gjenerallejtënant Juan Pablo Sanchez De Lara deklaroi nga Kuçova se Shqipëria është më shumë se kurrë e gatshme të marrë përgjegjësi për të mbrojtur sigurinë dhe paqen.

Shefi i misionit dhe i ngarkuari me punë në Ambasadën e SHBA në Tiranë, David Wisner tha në fjalën e tij se hapja e Bazës së parë Ajrore në Kuçovë përbën një tjetër gur kilometrik në përkushtimin e vazhdueshëm të Shqipërisë ndaj parimeve të NATO.

Shefi i Shtabit të Përgjithshëm të Forcave të Armatosura të Shqipërisë, gjeneralmajor Arben Kingji e konsideroi hapjen e Bazës Ajrore të NATO-s në Kuçovë një ngjarje të shënuar për forcat shqiptare dhe vetë Aleancën.

Kjo ceremoni u mbyll me një performancë të avionëve “Euro Fighter F-2000”, F-16 dhe dy helikopterëve “Black Hawk”.