Ministri i Mbrojtjes Niko Peleshi, homazhe në nder të gjeniut të letrave shqipe, Ismail Kadare

Ministri i Mbrojtjes Niko Peleshi zhvilloi homazhe në nderim të gjeniut të letrave shqipe, shkrimtarit Ismail Kadare, i cili u nda nga jeta më 1 korrik 2024.

Ministri Peleshi vendosi një kurorë në emrin e Ministrisë së Mbrojtjes, në simbol të respektit dhe mirënjohjes për kontributin që dha në ngritjen e imazhit dhe trashëgimisë së vendit përmes veprës së tij të madhe, që njihet botërisht.

Ministri u shprehu ngushëllimet bashkëshortes së shkrimtarit të madh dhe dy vajzave Besiana dhe Gresa, duke vlerësuar Kadarenë, si gjeniun e një gjenerate krijuesish të talentuar, prodhimtarë e patriotë, që i dhanë lëndë etjes sonë kombëtare për emancipim, qytetërim e modernizim.

Në ceremoninë shtetërore të organizuar nga qeveria shqiptare, zhvilluan homazhe personalitete të larta nga vendi, Kosova, Maqedonia e Veriut etj.