Newsroom Efektivë dhe mjete të FA, u angazhuan në shuarjen e dy vatrave të zjarrit në Dhërmi e në Qafën e Llogarasë
Dy vatra zjarri, të regjistruara në 24 orët e fundit në qarkun e Vlorës janë shuar, pas përpjekjeve të përbashkëta të forcave zjarrfikëse, efektivëve të Forcave të Armatosura, punonjësve të administratës së Zonave të Mbrojtura, punonjës të OSHEE e forcave të tjera, nën koordinimin e Agjencisë Kombëtare së Mbrojtjes Civile (AKMC).
Helikopteri Cougar dhe efektivë të Forcave të Armatosura u angazhuan menjëherë, sipas kërkesës së autoriteteve vendore, në shuarjen e zjarrit të rënë pasditen e së enjtes, në lagjen “Kondraq”, Dhërmi, duke shmangur rrezikun për banesat aty pranë.
Më e vështirë situata u paraqit në Qafën e Llogarasë, ku u konstatua një tjetër vatër zjarri, po pasditen e djeshme. Për të ndihmuar forcat e emergjencave në kryerjen e operacionit për shuarjen e flakëve, por edhe për shkak të tymit të përhapur në atë zonë, AKMC u kërkoi të gjithë drejtuesve të mjeteve të shmangnin kalimin në këtë rrugë. Pas disa orë përpjekjesh, ku u angazhuan edhe të tjerë efektivë të Forcave të Armatosura, mëngjesin e kësaj të premteje, u bë e mundur që flakët të shuhen dhe të shmanget rreziku për dëmtimin e Parkut Kombëtar të Llogarasë.
Grupi hetimor po punon për zbardhjen e plotë të rrethanave të ndezjes së zjarrit në Qafën e Llogarasë dhe për vënien para drejtësisë të autorit apo autorëve.
Agjencia Kombëtare e Mbrojtjes Civile dhe Ministria e Mbrojtjes u bëjnë thirrje banorëve të tregojnë kujdes, veçanërisht gjatë këtyre muajve të nxehtë, kur edhe mundësia për përhapjen e zjarreve është edhe më e madhe.
