Ndihma 13 milion Eur e BE për FA, takim mes drejtuesve të Ministrisë së Mbrojtjes së Shqipërisë dhe ekspertëve të BE

e martë, 30 korrik 2024 11:17

Ekipi i lartë drejtues i Ministrisë së Mbrojtjes dhe Forcave të Armatosura zhvilluan një takim pune të përbashkët me ekipin e ekspertëve të Bashkimit Evropian.

Ky takim vjen pas miratimit nga Këshilli Evropian të paketës mbështetëse financiare të BE prej 13 milion Euro për Ministrinë e Mbrojtjes në kuadër të instrumentit Fondi Evropian i Paqes (EPF).

Në takim u diskutuan dhe finalizuan hapat e mëtejshëm të zbatimit të mbështetjes, specifikimet e detajeve teknike dhe administrative të projektit.

Fondi mbështetës do përdoret për blerjen e mjeteve të blinduara, të lehta, të disaqëllimshme, që do të rrisin dhe përmirësojnë lëvizshmërinë, manovrimin dhe mbrojtjen e Forcave të Armatosura, në veçanti të Batalionit të Këmbësorisë së Lehtë të Forcës Tokësore, duke i mundësuar kështu Shqipërisë të mbrojë më mirë qytetarët e saj dhe të forcojë kontributin e saj të mundshëm në Politikën e Përbashkët të Sigurisë dhe Mbrojtjes ushtarake (CSDP) me pjesëmarrjen në operacionet dhe misionet ushtarake, grup - batalionet e Bashkimit Evropian.

Mjetet e transportit pritet të mbërrijnë në Shqipëri gjatë dy viteve të ardhshme.