Ministri Vengu me efektivët e Forcës Ajrore: Investime strategjike, me fokus të veçantë sistemin e radarëve

e enjte, 05 shkurt 2026 14:04

Ministri i Mbrojtjes, Pirro Vengu, ishte pranë efektivëve të Forcës Ajrore, ku vizitoi disa prej infrastrukturave kritike, me fokus të veçantë sistemet e radarëve ajrorë.

Ministri Vengu theksoi se Forca Ajrore ndodhet në një proces investimesh domethënëse, që synojnë jo vetëm përmirësimin e teknologjisë ekzistuese të radarëve, por edhe zgjerimin e kapaciteteve të tyre operacionale.
"Jemi në proces investimesh domethënëse, qoftë për përsosjen e sistemeve të radarëve, qoftë për zgjerimin e kapaciteve të tyre, në mënyrë që të jenë të ndërvrepueshme me NATO-n dhe me komandat përkatëse që mbulojnë zonën e interesit të Shqipërisë dhe të gjithë rajonit". -  theksoi ministri i Mbrojtjes.

Një tjetër shtyllë kyçe e këtij modernizimi, sipas ministrit Vengu, mbetet investimi në burimet njerëzore.

"Do të vijojmë të investojmë veçanërisht në kapacitetet njerëzore të Forcës Ajrore. Më shumë oportunitete këtë vit për inxhinierë, për të gjithë personelin e specializuar që vjen nga bota civile, për më shumë inovacion dhe një mirëmbajtje gjithnjë e më cilësore të këtyre sistemeve kritike, qoftë për mjetet tona, qoftë edhe për mjetet e reja që do t'i bashkohen Forcës Ajrore Shqiptare". - nënvizoi ministri Vengu.
Ky proces modernizimi mbështetet edhe nga rritja e fondeve në buxhetin e mbrojtjes për vitin 2026, të cilat do të shkojnë drejtpërdrejt për forcimin e kapaciteteve të Forcave të Armatosura, për ta kthyer sigurinë ajrore në një prioritet strategjik kombëtar.