Ministri i Mbrojtjes Ermal Nufi mikpret delegacionin e Gardës Kombëtare të New Jersey

Nufi: “Rikonfirmim i mbështetjes së qëndrueshme të SHBA. Thellojmë më tej partneritetin strategjik mes dy vendeve tona”.

Fotogaleria

Ministri i Mbrojtjes, z. Ermal Nufi mikpriti sot në mjediset e Ministrisë së Mbrojtjes delegacionin e Gardës Kombëtare të New Jersey, të kryesuar nga gjeneral brigade Yvonne L. Mays.

Takimi u zhvillua në kuadër të 25-vjetorit të partneritetit të Forcave të Armatosura të Republikës së Shqipërisë me Gardën Kombëtare të New Jersey, një bashkëpunim dypalësh që ka filluar në vitin 2001 si pjesë e Programit të Partneritetit Shtetëror (State Partnership Program), i iniciuar nga Departamenti Amerikan i Shtetit.

Përmes një publikimi në rrjetin e tij social, ministri Nufi shprehet:

“Në këtë vit jubilar të 25-vjetorit të partneritetit të Forcave të Armatosura të Republikës së Shqipërisë me Gardën Kombëtare të New Jersey, veçojmë me krenari bashkëpunimin e shkëlqyer në drejtim të rritjes së profesionalizmit, modernizimit dhe zhvillimit të kapaciteteve të forcave tona. Përgjatë takimit të sotëm me delegacionin e Gardës Kombëtare të New Jersey, të drejtuar nga gjeneral brigade Yvonne L. Mays, rikonfirmova mirënjohjen për mbështetjen e qëndrueshme të SHBA, si dhe gatishmërinë tonë për të thelluar më tej partneritetin strategjik mes Shqipërisë dhe SHBA.”