Ministria e Mbrojtjes, prezantohet drejtuesi i ri i Institutit të Gjeografisë dhe Infrastrukturës Ushtarake (IGJIU)
Në mjediset e Institutit të Gjeografisë dhe Infrastrukturës Ushtarake (IGJIU) u prezantua në prani të zëvendësministrit të Mbrojtjes z. Enkelejdi Joti, drejtori i ri, z. Besnik Hysaj.
Në fjalën e tij, zëvendësministri i Mbrojtjes Joti vlerësoi punën e bërë nga ish-drejtori Jurgen Çollaku, duke theksuar kontributin e tij gjatë drejtimit të institucionit.
Ai nënvizoi gjithashtu, nivelin e lartë të profesionalizmit të stafit të IGJIU, duke shtuar se Ministria e Mbrojtjes do të vijojë ta mbështesë aktivitetin e institutit, me synimin për të forcuar më tej rolin e tij në mbështetje të Forcave të Armatosura.
Drejtuesi i ri z. Besnik Hysaj pason z. Jurgen Çollaku si drejtues i Institutit të Gjeografisë dhe Infrastrukturës Ushtarake (IGJIU) pas një karriere të gjatë pranë Agjencisë Kombëtare të Mbrojtjes Civile (AKMC).
IGJIU është institucion kërkues e shkencor, projektues e prodhues, i cili funksionon si Agjenci Hartografike Kombëtare.
Që nga krijimi i tij në vitin 1975, IGJJU ka mbështetur me prodhime hartografike e gjeodezike të gjitha strukturat e mbrojtjes, gjithashtu ka luajtur rol të rëndësishëm në studimin dhe projektimin e veprave të ndryshme inxhinierike, të infrastrukturës dhe të atyre në funksion të ekonomisë së vendit.
Sot ky institucion i rëndësishëm ka lidhje me mjaft institucione dhe shërbime homologe të vendeve anëtare dhe partnere të NATO-s, me disa prej të cilëve ka nënshkruar marrëveshje dhe memorandume mirëkuptimi.
Artikuj nga Newsroom
