30-vjetori i Qendrës së Gjuhëve të Huaja, zëvendësministrja Skana: Ka përgatitur drejtues që kanë përfaqësuar FA në NATO
Qendra e Gjuhëve të Huaja, pranë Kolegjit të Mbrojtjes dhe Sigurisë festoi 30 vjetorin e themelimit. Në ceremoninë e organizuar me këtë rast, mori pjesë edhe zëvendësministrja e Mbrojtjes Pranvera Skana.
Gjatë fjalës së saj, në prani edhe të pedagogëve, oficerëve dhe studentëve, zëvendësministrja Skana e cilësoi këtë një moment të rëndësishëm.
“Në fushën e mbrojtjes dhe sigurisë, gjuha nuk është thjesht një mjet për shkëmbimin e informacionit. Ajo është një urë lidhëse, thelbi i diplomacisë ushtarake dhe një aset strategjik që garanton bashkëpunimin. Gjatë këtyre tre dekadave, ky departament ka bërë një punë të jashtëzakonshme duke përgatitur oficerë dhe drejtues që kanë përfaqësuar me krenari Forcat tona të Armatosura në misione ndërkombëtare, në selinë e NATO-s dhe në forume kyçe të sigurisë globale. “ - u shpreh zëvendësministrja e Mbrojtjes.
Sipas saj, suksesi i operacioneve të përbashkëta varet po aq nga fuqia e fjalës dhe ndërtimi i besimit, sa edhe nga përgatitja taktike. Zëvendësministrja e Mbrojtjes shprehu mirënjohjen për stafin akademik dhe profesorët që kontribuuan në këtë qendër ndër vite.
Misioni i Qendrës së Gjuhëve të Huaja pranë Kolegjit të Mbrojtjes dhe Sigurisë është aftësimi i personelit ushtarak dhe civil për t'iu përgjigjur kërkesave të NATO-s dhe operacioneve ndërkombëtare. Kjo qendër planifikon dhe zhvillon punën shkencore në drejtim të përsosjes se programeve, metodave dhe teknikave në drejtim të mësimit, testimit dhe përkthimit të gjuhëve të huaja në funksion të objektivave të FA si vend anëtar i NATO.
Po ashtu një nga funksionet e kësaj qendre është rritja e bashkëpunimin me strukturat analoge të vendeve anëtare dhe partnere të NATO-s, duke shkëmbyer eksperiencën për të implementuar programet dhe teknikat më të përparuara në drejtim të mësimit të gjuhëve të huaja.
Artikuj nga Newsroom
