Qeveria miraton tre vendime për Forcat e Armatosura, mbrojtjen civile dhe zgjatjen e afatit të misionit në Letoni

e enjte, 28 Maj 2026 14:51

Në mbledhjen e sotme të Këshillit të Ministrave u miratuan tre vendime të rëndësishme që lidhen me funksionimin e Forcave të Armatosura, forcimin e mbrojtjes civile dhe vijimin e angazhimeve të Shqipërisë në kuadër të NATO-s.

Vendimet u bënë publike pas mbledhjes së Këshillit të Ministrave nga ministri i Mbrojtjes, z. Ermal Nufi. Një prej vendimeve të miratuara i hap rrugë njësimit të gradave ushtarake me funksionet organike në Forcat e Armatosura të Republikës së Shqipërisë, në përputhje me strukturën e re organizative të miratuar. Sipas ministrit Nufi, vendimi i ri do të sjellë më shumë qartësi ligjore.

“Që në vitin 2015 me miratimin e VKM-së dhe më vonë me ndryshimin e strukturës, ka patur disa mospërputhje, të cilat janë adresuar në këtë vendim të Këshillit të Ministrave të ditës së sotme.” - deklaroi ministri i Mbrojtjes.

Një tjetër vendim i miratuar nga qeveria lidhet me fondin për parandalimin dhe menaxhimin e fatkeqësive natyrore për vitin 2026. Në kuadër të këtij fondi do të financohen 44 projekte, nga të cilat 26 projekte infrastrukturore dhe 18 projekte për blerje mjetesh dhe pajisjesh. Projektet do të zbatohen nga njësitë e Vetëqeverisjes Vendore, ndërsa vlera totale e financimit arrin në rreth 650 milionë lekë.

Sipas ministrit Nufi, investimet synojnë uljen e riskut nga fatkeqësitë natyrore, forcimin e sistemit të mbrojtjes civile dhe garantimin e mbrojtjes së jetës së qytetarëve.

“Të gjitha projekte do të zbatohen nga njësitë e vetëqeverisjes vendore dhe do të veprojnë si aktivitete kontraktore për prokurimin e të gjitha këtyrë shërbimeve për infrastrukturën apo për mjetet në varësi të njësive. Vlera totale e financimit për projektin do të arrijë në masën 650 milionë lekë, ndërsa pjesa tjetër do të financohet përgjatë vitit 2027-të. Me këtë vendim, ne ulim riskun nga fatkeqësitë, forcojmë sistemin e mbrojtjes dhe garantojmë mbrojtjen për të gjithë qytetarët.”- deklaroi ministri Nufi.

Gjatë deklaratës së tij, ministri Nufi njoftoi edhe miratimin e zgjatjes së afatit të pjesëmarrjes së Forcave të Armatosura shqiptare në misionin e NATO-s në deri më 31 dhjetor 2029.

Shqipëria do të vijojë të kontribuojë në këtë mision me një togë në funksion të sigurisë kolektive në krahun lindor të Aleancës. Ministri Nufi theksoi se pjesëmarrja në operacionet dhe misionet e NATO rrit ndërveprueshmërinë me aleatët dhe konsolidon rolin e Shqipërisë si aleat aktiv dhe i besueshëm në sigurinë e përbashkët.