Hapet Shkolla Kombëtare e Fluturimit, ministri Nufi: Përgatisim pilotët dhe kontrollorët e së ardhmes sipas standardeve të NATO-s

Në Komandën e Forcës Ajrore në Rinas u zhvillua sot ceremonia e hapjes së Shkollës Kombëtare të Fluturimit, një investim strategjik që shënon një etapë të re në modernizimin e Forcës Ajrore dhe fuqizimin e kapaciteteve mbrojtëse të Shqipërisë.

Në ceremoni morën pjesë kryeministri Edi Rama, ministri i Mbrojtjes Ermal Nufi, drejtues të Forcave të Armatosura, partnerë ndërkombëtarë dhe 25 kandidatët e parë të shkollës.

Në fjalën e tij, ministri i Mbrojtjes Ermal Nufi theksoi se, kjo shkollë nuk është vetëm një strukturë e re arsimimi, por një kapacitet i ri strategjik për sigurinë kombëtare.

"Ne nuk po përurojmë thjesht një strukturë të re arsimimi apo trajnimi, por po hedhim një tjetër gur themeli në fuqizimin e kapaciteteve të Forcës sonë Ajrore të së ardhmes. Po krijojmë një kapacitet të ri strategjik për mbrojtjen dhe sigurinë kombëtare, të lidhur drejtpërdrejt me zhvillimin e burimeve njerëzore.", theksoi ministri Nufi.

Ministri nënvizoi se Shkolla Kombëtare e Fluturimit do të përgatisë pilotë dhe kontrollorë fluturimi sipas metodologjive më të avancuara të aleatëve të NATO-s, duke kombinuar teknologjinë moderne me standardet më të larta të trajnimit.

"Në këtë kuadër, një rol të veçantë kanë edhe dy helikopterët e rinj të trajnimit, Bell 505, të cilët i janë bashkuar tashmë kapaciteteve të Forcës tonë Ajrore si platformë moderne për formimin e pilotëve të së ardhmes." - nënvizoi Ministri i Mbrojtjes.

Nufi u shpreh se investimet janë pjesë e një vizioni afatgjatë për transformimin e Forcave të Armatosura: "Investimet në infrastrukturë, teknologji dhe mbi të gjitha, në zhvillimin e burimeve njerëzore janë pjesë e një strategjie afatgjatë, që synon ta bëjë Shqipërinë një aleate më të aftë, më të besueshme në kuadër të NATO-s. Në këtë kuadër, pikërisht kjo shkollë mishëron vizionin e Qeverisë Shqiptare për modernizimin e Forcave të Armatosura, për forcimin e kapaciteteve tona mbrojtëse".

Në kuadër të nisjes së aktivitetit të shkollës u mirëpritën edhe 25 kandidatët e parë, të cilët do të ndjekin programin e formimit për pilotë dhe kontrollorë të fluturimit.

Ndërsa Forca Ajrore do të ketë 5 pilotë të trajnuar në vit për secilin nga 5 vitet e ardhshme, si dhe personelin teknik mirëmbajtës të këtij helikopterit mësimor Bell 505.

Artikuj nga Newsroom