Ministri Nufi vlerëson me Certifikatë Mirënjohjeje atasheun ushtarak të Bullgarisë

Ministri i Mbrojtjes, Ermal Nufi i dorëzoi Certifikatën e Mirënjohjes kolonel Miroslav Sandrev, atasheut ushtarak të Republikës së Bullgarisë në Shqipëri, me rastin e përfundimit të misionit të tij diplomatik në vendin tonë.

Gjatë ceremonisë, ministri Nufi vlerësoi kontributin e kolonel Sandrev në forcimin e bashkëpunimit dypalësh në fushën e mbrojtjes, duke theksuar rolin e tij në zhvillimin e marrëdhënieve mes Forcave të Armatosura të Shqipërisë dhe Bullgarisë.

Ministri Nufi nënvizoi se angazhimi i kolonel Sandrev ka shërbyer në thellimin e bashkëpunimit ndërmjet dy vendeve aleate në NATO, duke kontribuar në avancimin e partneritetit dhe koordinimit në çështjet e sigurisë dhe mbrojtjes.

Në përfundim, ministri i Mbrojtjes i uroi kolonel Miroslav Sandrev suksese në detyrat e ardhshme, duke shprehur bindjen se marrëdhëniet e shkëlqyera mes Shqipërisë dhe Bullgarisë do të vijojnë të forcohen edhe më tej në të ardhmen.