Atasheu ushtarak i Turqisë në Shqipëri vlerësohet me Certifikatë Mirënjohjeje nga ministri Nufi

e hënë, 20 korrik 2026 13:23

Në mbyllje të mandatit të tij në vendin tonë, atasheu ushtarak i Turqisë në Shqipëri, kolonel Tolga Kip është vlerësuar me Certifikatë Mirënjohjeje nga ministri i Mbrojtjes së Republikës së Shqipërisë, z. Ermal Nufi.

Ministri Nufi i ka akorduar Certifikatën e Mirënjohjes për kontributin e veçantë të kolonel Kip në forcimin e marrëdhënieve ndërmjet Forcave të Armatosura të Shqipërisë dhe Turqisë, si dhe në thellimin e bashkëpunimit në fushën e mbrojtjes dhe sigurisë.

Në publikimin e tij, z. Nufi u shpreh gjithashtu se:

“Shqipëria dhe Turqia, aleate në NATO dhe partnere strategjike, vijojnë të ndërtojnë një bashkëpunim të ngushtë, të bazuar në besim të ndërsjellë dhe mbështetje konkrete për modernizimin e Forcave të Armatosura, zhvillimin e kapaciteteve ushtarake, trajnimin e personelit dhe koordinimin në kuadër të misioneve ndërkombëtare.”