Përgatitjet për sezonin e zjarreve, ministri Nufi: “Shqipëria më e përgatitur dhe më e koordinuar se kurrë në përballimin e emergjencave civile”

Në Bazën Ajrore të Farkës u zhvillua aktiviteti për prezantimin e kapaciteteve dhe gatishmërisë së strukturave të mbrojtjes civile për sezonin e zjarreve. Të pranishëm në aktivitet ishin kryeministri Edi Rama, ministri i Mbrojtjes Ermal Nufi, ministri i Brendshëm Besfort Lamallari, ministri i Shtetit për Pushtetin Vendor Ervin Demo, shefi i Shtabit të Përgjithshëm të Forcave të Armatosura, gjenerallejtënant Arben Kingji, prefektë, kryetarë bashkish, efektivë etj.

Në fjalën e tij, ministri i Mbrojtjes, z. Ermal Nufi theksoi se: “Shqipëria është sot më e përgatitur dhe më e koordinuar se kurrë për t'u përballur me emergjencat civile, duke nënvizuar se ky është viti më i mirë sa i përket menaxhimit të zjarreve”.

"Sot, me krenari them se ky mund të jetë ndër vitet më të mira për sa i përket situatës së menaxhimit të zjarreve. Kjo nuk është për shkak të fatit apo rastësisë, por falë koordinimit dhe angazhimit të jashtëzakonshëm të të gjitha strukturave që menaxhojnë situatat emergjente.", u shpreh Ministri Nufi.

Ministri i Mbrojtjes Nufi solli në vëmendje sfidat e sezonit të kaluar të zjarreve, duke kujtuar se viti 2025 ishte një provë e rëndësishme për strukturat e mbrojtjes civile, me një situatë me intensitet të lartë dhe shtrirje të gjerë territoriale.

“Dëshmia më e mirë është se kur institucionet bashkëpunojnë dhe kur profesionalizmi e përgjegjësia vihen mbi çdo interes tjetër, ne jemi në gjendje t'u përgjigjemi me sukses edhe sfidave më të vështira. Mirënjohje shumë të sinqertë për secilin efektiv, dhe punonjës që kontribuon në këtë sektor.” - nënvizoi Ministri Nufi.

Një vëmendje të veçantë, sipas ministrit Nufi, i është kushtuar forcimit të kapaciteteve të pushtetit vendor. Ai theksoi se financimi për mbrojtjen civile është rritur nga rreth 800 milionë lekë në vitin 2025 në mbi 1 miliard lekë të planifikuara për vitin 2026, si një tregues konkret i angazhimit të qeverisë shqiptare për të forcuar kapacitetet aty ku emergjencat përballohen të parat, pranë komuniteteve dhe bashkive.

Në përfundim të fjalës së tij, ministri Nufi falënderoi të gjitha strukturat e angazhuara në përballimin e emergjencave civile, duke nisur nga zjarrfikësit në bashki, prefektët, kryetarët e bashkive, Agjencinë Kombëtare të Mbrojtjes Civile dhe Forcat e Armatosura, si edhe efektivët që ndërhyjnë çdo ditë në terren dhe nga ajri për shuarjen e zjarreve.