Nënshkruhet Plani i Bashkëpunimit Ushtarak për vitin 2015 me Turqinë

e mërkurë, 04 mars 2015 12:46

Nënshkruhet ndërmjet Ministrisë së Mbrojtjes së Republikës së Shqipërisë dhe Ministrisë së Mbrojtjes Kombëtare të Republikës së Turqisë Plani i Bashkëpunimit Ushtarak për vitin 2015.

Në një ceremoni të thjeshtë, të organizuar në ambientet e Ministrisë së Mbrojtjes u nënshkrua nga z. Igli Hasani, drejtor i Përgjithshëm i Planifikimit Strategjik të Mbrojtjes dhe kolonel Nizamettin Dogar, atashe ushtarak i Republikës së Turqisë në Tiranë, plani i aktiviteteve për vitin 2015, duke i hapur rrugë implementimit të menjëhershëm të tyre.

Z. Hasani falenderoi atasheun turk për ndihmën e vazhdueshme që Republika e Turqisë jep për modernizimin dhe arsimimin e Forcave të Armatosura të Republikës së Shqipërisë. Në mënyrë të veçantë u shpreh mirënjohja për fondet grant që çdo vit qeveria turke jep nëpërmjet marrëveshjeve të bashkëpunimit ekonomiko-ushtarak. Këto fonde shërbejnë për prokurime në fushën e mbrojtjes dhe për kurset apo specializimet që ushtarakët shqiptarë kryejnë falas në Turqi.

Kolonel Dogar rikonfirmoi mbështetjen e shtetit që ai përfaqëson për ushtrinë shqiptare, duke theksuar se marrëdhëniet Shqipëri-Turqi janë trajtuar përherë me kujdes dhe dashamirësi të veçantë nga qeveria turke. Atasheu ushtarak garantoi se bashkëpunimi dhe ndihma e vendit të tij për një partner strategjik të vyer si Shqipëria nuk do të mungojë as në të ardhmen.

Bisedimet u fokusuan në dy projektmarrëveshje të reja, të cilat janë duke u negociuar ndërmjet dy qeverive, atë të mbështetjes logjistike për kontigjentin shqiptar, që aktualisht shërben në Kabul, nën komandën turke në kuadër të misionit të NATO Resolute Support Mission dhe projektmarrëveshjen e trajtimit shëndetësor të personelit ushtarak dhe atij civil të Ministrisë së Mbrojtjes në spitalet ushtarake turke.

Turqia dhe Shqipëria, si vende anëtare të NATO ndajnë të njëjtin qëndrim për situatën aktuale gjeopolitike dhe vendimet e fundit të Aleancës.