Deklaratë për shtyp e Shtabit të Përgjithshëm të FA

e shtunë, 29 mars 2014 17:53

Shtabi i Përgjithshëm i Forcave të Armatosura i shpreh ngushëllime të thella familjarëve të Arben Doskut i cili humbi jetën sot dhe Lavdrim e Alfred Doskut që mbetën të plagosur në fshatin Zgarë të Librazhdit.

Forcat e Armatosura kanë bërë dhe do të vazhdojnë të bëjnë të pamundurën për të shmangur ngjarje dhe incidente të këtij lloji me pasojë humbjen e jetëve njerëzore apo dëmtimin e banorëve, por vërejmë me shqetësim se shumë pak bëhet nga pushteti lokal.

FA përmes ruajtjes, patrullimit, vëzhgimit, vendosjes së shenjave të domosdoshme dhe fushatave sensibilizuese si dhe në bashkëpunim me pushtetin lokal, përpiqen maksimalisht të shmangin këto ngjarje. Pavarësisht këtyre masave bëjmë me dije se është i pamundur kontrolli fizik i imtësishëm dhe i vazhdueshëm i këtyre zonave të thella që dikur kanë shërbyer si poligone asgjësimi.
Shtabi i Përgjithshëm i FA siguron opinionin publik se në këtë zonë nuk zhvillohet proces demilitarizimi pasi ky proces ka përfunduar që në shtator të vitit 2012, megjithatë kujdesi duhet të jetë i vazhdueshëm.